خلیج اردو
دبئی: المکتوم انٹرنیشنل ایئرپورٹ کا پہلا مرحلہ 2032 تک مکمل کیا جائے گا، جو سالانہ 15 کروڑ مسافروں کو سنبھالنے کی صلاحیت رکھے گا۔ یہ اعلان جمعرات کو ایک اعلیٰ عہدیدار نے کیا اور بتایا کہ ایئرپورٹ کے فعال ہونے کے بعد دبئی انٹرنیشنل ایئرپورٹ (ڈی ایکس بی) کی تمام پروازوں کی ذمہ داری بتدریج ڈی ڈبلیو سی سنبھال لے گا۔
اس منصوبے کے تحت ایک ارب درہم کا معاہدہ دوسرا رن وے تعمیر کرنے کے لیے دیا گیا ہے۔ یہ اعلان دبئی ایوی ایشن سٹی کارپوریشن کے ایگزیکٹو چیئرمین خلیفہ الزافن نے دی ایئرپورٹ شو کے موقع پر کیا۔
ہفتے کے آغاز میں حکام نے اس منصوبے کے ڈیزائن کی تفصیلات جاری کی تھیں، جسے دنیا کا سب سے جدید ایئرپورٹ قرار دیا جا رہا ہے۔ خلیفہ الزافن نے تصدیق کی کہ ٹھیکیداروں سے مذاکرات جاری ہیں اور منصوبے کو وقت پر مکمل کرنے کے لیے ٹیم "فیصلہ کن اقدامات” کر رہی ہے۔
