عید الاضحیٰ کی تعطیلات: یورپ کی جانب رجحان میں نمایاں اضافہ، یو اے ای رہائشی بڑی تعداد میں بیرون ملک سفر کی تیاری میں مصروف

خلیج اردو
دبئی: متحدہ عرب امارات میں عید الاضحیٰ کی تعطیلات قریب آتے ہی شہریوں نے سفر کی تیاریاں تیز کر دی ہیں، اور اس سال یورپ سب سے زیادہ پسندیدہ منزل بن کر ابھرا ہے۔ معروف ٹریول پلیٹ فارم musafir.com کے مطابق گزشتہ سال کے مقابلے میں اس سال عید کے سفر سے متعلق استفسارات میں 40 فیصد اضافہ ریکارڈ کیا گیا ہے، جو طویل اور تجرباتی چھٹیوں کے بڑھتے رجحان کی نشاندہی کرتا ہے۔

سویٹزرلینڈ، فرانس، اٹلی، جرمنی، لٹویا اور بڈاپسٹ جیسے ممالک زیادہ ٹھنڈے موسم، مشہور سیاحتی مقامات اور ثقافتی تجربات کی وجہ سے اولین فہرست میں شامل ہیں۔ مشرق بعید میں جاپان بھی خوابوں کی سرزمین کے طور پر مقبولیت حاصل کر رہا ہے۔

ٹریول ماہرین کے مطابق زیادہ تر مسافر 8 سے 10 دنوں پر محیط دوروں کو ترجیح دے رہے ہیں تاکہ وہ ایک سے زائد شہروں کو دریافت کر سکیں اور اپنے سفر سے بھرپور لطف اٹھا سکیں۔

musafir.com کے چیف آپریٹنگ آفیسر رہیش بابو کے مطابق: "لوگ صرف وقفہ نہیں چاہتے، بلکہ ایک بھرپور تجربہ چاہتے ہیں۔ یورپ کے ایک بار کے خواب جیسے سفر کے ساتھ ساتھ ایشیا میں سستی مختصر چھٹیوں کی مانگ بھی بڑھ رہی ہے۔”

دوسری جانب تھائی لینڈ، بالی، ملیشیا، سنگاپور اور ہانگ کانگ جیسی مقامات اب بھی خاندانوں کے لیے پسندیدہ ہیں، جہاں ساحلی تفریح، رنگین شہری زندگی، بچوں کے لیے کشش اور کم لاگت میں لگژری سہولیات دستیاب ہیں۔ ان ممالک کی مختصر پروازیں اور ویزہ کی آسان پالیسیاں بھی انہیں تین سے پانچ دن کی چھٹیوں کے لیے موزوں بناتی ہیں۔

اعداد و شمار کے مطابق 35 سے 40 فیصد بکنگز یورپ کی جانب ہو رہی ہیں، جن میں سویٹزرلینڈ اور لٹویا نمایاں ہیں، ان کی آسان ویزہ پالیسی اور کم خرچ پیکجز کی وجہ سے۔ بکنگز میں 60 فیصد حصہ خاندانی سفر کا ہے، جبکہ صرف خواتین کے گروپوں میں سفر کا رجحان بھی بڑھ رہا ہے، جس میں گزشتہ سال کے مقابلے میں 15 فیصد اضافہ متوقع ہے۔

نوجوان نسل، خاص طور پر ملینیئلز میں اکیلے سفر کرنے کا رجحان برقرار ہے، جبکہ گروپ ٹورز میں بھی 10 فیصد اضافہ ہوا ہے، جو ان کی سہولت اور لاگت میں کمی کی وجہ سے مقبول ہو رہے ہیں۔

دلچسپ بات یہ ہے کہ اب لوگ پیشگی منصوبہ بندی کر رہے ہیں۔ تقریباً 60 فیصد مسافر تین سے پانچ ہفتے قبل بکنگ کر رہے ہیں تاکہ آخری وقت پر مہنگے کرایوں سے بچ سکیں، خاص طور پر برطانیہ، بھارت، جنوب مشرقی ایشیا اور یورپ کی جانب۔

مہنگی سفری لاگت کے باعث یو اے ای کے اندر اسٹے کیشنز یعنی مقامی تعطیلات کا رجحان بھی بڑھ رہا ہے۔ خاص طور پر وہ خاندان جنہیں گرمیوں کی چھٹیوں سے پہلے بجٹ کا خیال رکھنا ہوتا ہے۔ اس عید پر یو اے ای ہوٹلز میں مکمل بکنگ متوقع ہے۔

اس سال سفر کے رجحانات کو مختلف تھیمز کے تحت تقسیم کیا جا رہا ہے:

لگژری یا خوابوں کی منزلیں: سویٹزرلینڈ، فرانس، جاپان
ثقافتی یا خاندانی مقامات: ترکی، بالی، ملیشیا
کم لاگت والے مختصر سفر: جارجیا، آرمینیا، آذربائیجان
نئے ابھرتے ہوئے مقامات: لٹویا، مراکش، ازبکستان، العلا

سفر کے بجٹ عام طور پر فی شخص 3500 سے 5500 درہم کے درمیان ہیں، اور زیادہ تر لوگ ایسی چھٹیوں کو ترجیح دے رہے ہیں جو آرام، ثقافت، اور ترتیب دی گئی سرگرمیوں کا حسین امتزاج فراہم کریں۔

فلائی دبئی نے بھی 2249 درہم سے شروع ہونے والے عید پیکجز پیش کیے ہیں، جن میں کرابی، لانگ کاوی، باکو، استنبول اور مالدیپ شامل ہیں۔ ان میں ریٹرن فلائٹس اور ہوٹل قیام شامل ہیں، اور بکنگز 15 مئی تک کھلی ہیں، جبکہ سفر کی تاریخیں 5 سے 9 جون کے درمیان ہوں گی۔

The Holidave Travel کے منیجنگ ڈائریکٹر ڈیوڈ گنجی کے مطابق جارجیا، قازقستان، کرغزستان، باکو اور ازبکستان جیسے ممالک بھی اپنی خوبصورتی، آسان ویزہ عمل اور ثقافتی گہرائی کے باعث مقبول ہو رہے ہیں۔

انہوں نے مزید کہا: "یہ ممالک چار گھنٹے کے اندر پہنچنے کے قابل ہیں اور اصل معنوں میں قیمتی تجربہ فراہم کرتے ہیں۔ لوگ اب ایسے سفر چاہتے ہیں جو یادگار ہوں اور جن میں مشکلات کم ہوں۔