دبئی کے فلمساز کی منفرد پیشکش: "چتھا پچھا” میں خالد العامری کی انٹری، شائقین خوشی سے جھوم اُٹھے

خلیج اردو
دبئی: معروف اماراتی سوشل میڈیا شخصیت خالد العامری کی نئی ملیالم فلم چتھا پچھا: دی رنگ آف راڈیز میں اچانک انٹری نے شائقین کو حیران کر دیا ہے۔ مگر فلم کے ہدایت کار شیحان شوکت کے مطابق، یہ فیصلہ بالکل فطری تھا۔

دبئی سے تعلق رکھنے والے شیحان نے خلیج ٹائمز سے گفتگو میں بتایا: "میں اکثر مذاق میں کہتا ہوں کہ خالد ایک ’گود لیے گئے‘ ملیالی ہیں۔ خلیجی علاقوں میں رہنے والے ملیالیوں کی خالد سے محبت کچھ اور ہی ہے۔ جب وہ سیٹ پر آئے، تو ایسا لگا جیسے کوئی اپنا آ گیا ہو۔”

خالد العامری کا منفرد کردار

شیحان نے کہا کہ خالد کی گرمجوش، سادہ، اور مزاحیہ شخصیت نے فلم کے کردار کو تشکیل دینے میں بڑا کردار ادا کیا۔ "ہم نے ان کے اصل انداز کو ایک تخلیقی موڑ کے ساتھ فلم کی دنیا میں ڈھالا۔ یہ تجربہ نہایت دلچسپ رہا۔”

فلم کی کہانی اور جذبہ

چتھا پچھا کی کہانی بظاہر ایک خواب جیسی لگتی ہے: فورٹ کوچی میں تین بچھڑے ہوئے بھائی اپنا WWE طرز کا ریسلنگ کلب قائم کرتے ہیں۔ لیکن شیحان کے انداز میں یہ کہانی بچپن کی یادوں، خاندانی افراتفری، اور چھوٹے خوابوں کی بڑی لڑائی کا مظہر بن جاتی ہے۔

شیحان نے کہا: "میرے ذہن میں وہ دن تازہ ہو گئے جب میں اور میرا بھائی، حتیٰ کہ دادی بھی، ایک ہی کمرے میں بیٹھ کر WWE دیکھا کرتے تھے۔ وہ شور، بھائی چارہ، اور کشتی کی دیوانگی ہی ہماری کہانی کی بنیاد بنی۔”

ستاروں سے سجی کاسٹ اور دبنگ مناظر

فلم میں روشن میتھیو، ارجن اشوکن، وشاک نائر، اور شیحان کے بھائی ایشان شوکت شامل ہیں، جنہوں نے فلم مارکو میں بھی نمایاں کارکردگی دکھائی تھی۔ "فلم کے سیٹ پر سب کچھ پاگل پن جیسا رہا، مگر بہترین انداز میں!” شیحان نے ہنستے ہوئے کہا۔

بارش میں حقیقی لوکیشنز پر شوٹنگ، اور حقیقی کشتی کے شوقین افراد کو بطور ایکسٹرا شامل کرنا، سب نے فلم کی حقیقت پسندی کو بڑھا دیا۔ سینماٹوگرافر انند سی چندرن کی موجودگی میں بچے اداکاروں کی خود ساختہ حرکات نے سب کو حیرت میں ڈال دیا۔

WWE طرز کی کشتی، مکمل ایکشن کے ساتھ

شیحان کے مطابق، فلم میں کشتی کے مناظر محض نمائشی نہیں، بلکہ مکمل فزیکل ٹریننگ اور حقیقت سے جُڑے ہوئے ہوں گے۔ اسٹنٹ ڈائریکٹر کلائی کنگسن نے WWE کی سائیکالوجی کا باقاعدہ مطالعہ کیا، اور حقیقی فائٹرز کو کاسٹ کیا گیا تاکہ ہر پنچ کا اثر محسوس ہو۔

بین الاقوامی معاہدے اور سوشل میڈیا پر دھوم

چتھا پچھا کی بین الاقوامی تھیٹرک حقوق دبئی کی کمپنی The Plot Pictures نے ایک بڑی رقم میں حاصل کیے، جو ملیالم سنیما کے لیے ایک بڑی پیش رفت ہے۔ ساتھ ہی، شنکر-احسان-لائی کے ملیالم فلمی ڈیبیو نے موسیقی کی دنیا میں بھی ہلچل مچا دی ہے۔

شیحان نے بتایا: "ایک گانا تو جیسے باغی ترانہ بن چکا ہے، سب کے سروں پر سوار ہے۔”

ادھر سوشل میڈیا پر #ChathaPachaChallenge کے ذریعے شائقین اپنی WWE طرز کی چالیں دکھا کر فلم میں کیمیو حاصل کرنے کی کوشش کر رہے ہیں۔

چتھا پچھا: دی رنگ آف راڈیز رواں سال کے آخر میں سینما گھروں کی زینت بنے گی۔ اور اگر شائقین کا جوش و خروش دیکھا جائے، تو اس فلم کا کاؤنٹ ڈاؤن شروع ہو چکا ہے۔