خلیج اردو
دبئی: پیر کی صبح دبئی میں سونے کی قیمتوں میں نمایاں کمی دیکھی گئی، جہاں قیمتی دھات کی قیمت فی گرام 5 درہم سے زائد کم ہو کر 400 درہم سے نیچے آ گئی۔ یہ کمی امریکہ اور چین کے درمیان مثبت تجارتی بات چیت اور امریکی ڈالر کی مضبوطی کے باعث دیکھنے میں آئی۔
اماراتی وقت کے مطابق صبح 9 بجے 24 قیراط سونا فی گرام 395.25 درہم پر کھلا، جو گزشتہ ہفتے کے اختتام پر تقریباً 400.5 درہم فی گرام تھا۔ دیگر اقسام میں 22 قیراط 366 درہم، 21 قیراط 350.75 درہم اور 18 قیراط 300.75 درہم فی گرام پر ٹریڈ ہوا۔
عالمی منڈی میں اسپاٹ گولڈ 1.5 فیصد کمی کے بعد 3,277.53 ڈالر فی اونس پر ٹریڈ کر رہا تھا۔ اتوار کو امریکہ اور چین کے درمیان تجارتی مذاکرات خوشگوار اختتام کو پہنچے، جس میں امریکہ کے تجارتی خسارے کو کم کرنے پر بات چیت ہوئی۔
دونوں ممالک نے ایک دوسرے پر ٹیکس عائد کر کے تجارتی جنگ کو ہوا دی تھی، جس سے عالمی کساد بازاری کے خدشات پیدا ہوئے۔
ایکس ایس ڈاٹ کام کی مارکیٹ تجزیہ کار لنہ ٹران نے کہا کہ سونے کی قیمتوں میں کمی امریکہ اور چین کے درمیان تجارتی مذاکرات میں پیش رفت اور امریکی ڈالر کے نمایاں طور پر بحال ہونے کے باعث ہوئی۔
امریکی میڈیا نے رپورٹ کیا ہے کہ ٹرمپ انتظامیہ چینی مصنوعات پر عائد 145 فیصد ٹیکس کو کم کر کے 50 فیصد تک لانے پر غور کر رہی ہے، جسے مارکیٹس میں تناؤ کم کرنے کی جانب قدم تصور کیا جا رہا ہے۔
ٹران نے مزید کہا: "مارکیٹ نے فوری ردعمل کے طور پر محفوظ اثاثہ جات جیسا کہ سونا بیچنا شروع کر دیا، جب کہ حصص اور کرنسیوں میں رسک لینے کا رجحان قدرے بہتر ہوا۔”
انہوں نے یہ بھی واضح کیا کہ تجارتی عوامل کے علاوہ امریکی ڈالر کی مضبوطی نے سونے کی قیمتوں میں کمی کو مزید بڑھا دیا۔
