خلیج اردو
دبئی: مصنوعی ذہانت کی چپ بنانے والی امریکی اسٹارٹ اپ کمپنی گروک (Groq Inc.) نے 750 ملین ڈالر کی سرمایہ کاری حاصل کر لی ہے، جس کے بعد کمپنی کی مالیت 6.9 بلین ڈالر ہو گئی ہے۔ یہ پیشرفت اس بات کی غمازی کرتی ہے کہ سرمایہ کار اے آئی ورک لوڈز کے لیے درکار چپس اور کمپیوٹنگ پاور کی بڑھتی طلب پوری کرنے والی کمپنیوں میں گہری دلچسپی رکھتے ہیں۔
سرمایہ کاری کے اس راؤنڈ کی قیادت ڈسرپٹو نے کی، جب کہ بلیک راک، نیوبرگر برمن، ڈوئچے ٹیلی کام کیپیٹل پارٹنرز سمیت پرانے سرمایہ کاروں سیمسنگ، سسکو، ڈی ون اور الٹی میٹر نے بھی حصہ لیا۔ گروک کے مطابق ایک بڑی امریکی ویسٹ کوسٹ میوچل فنڈ نے بھی اس میں سرمایہ کاری کی ہے۔
کمپنی اس سرمایہ کو اپنے ڈیٹا سینٹرز کی گنجائش بڑھانے پر خرچ کرے گی اور اس سال ایشیا پیسفک میں اپنی پہلی لوکیشن کے اعلان کا ارادہ رکھتی ہے۔ سی ای او جوناتھن روس نے کہا کہ کئی گاہکوں کی طلب اس وقت کمپنی کی موجودہ صلاحیت سے زیادہ ہے۔
فی الحال گروک امریکہ، کینیڈا، یورپ اور مشرق وسطیٰ میں 13 سہولتیں چلا رہی ہے اور سعودی عرب کی اے آئی کمپنی "Humain” کی سروسز اور اوپن اے آئی کے GPT-OSS ماڈل کی لانچنگ میں بھی سہولت فراہم کر رہی ہے۔
اگرچہ کمپنی نے گزشتہ ماہ اپنی صلاحیت میں 10 فیصد سے زیادہ اضافہ کیا ہے، لیکن یہ سب پہلے ہی مکمل طور پر استعمال میں ہے۔ رپورٹس کے مطابق گروک نے 2025 کے لیے اپنی ریونیو پروجیکشنز میں ایک ارب ڈالر سے زیادہ کمی کی تھی، تاہم ذرائع کے مطابق یہ آمدنی اب 2026 میں متوقع ہے۔
