خلیج اردو
ایران نے جاری کشیدگی کے خاتمے کے لیے جنگ بندی کی صورت میں اپنی چھ واضح شرائط پیش کر دی ہیں، جنہیں علاقائی ثالثوں اور بین الاقوامی فریقین تک پہنچا دیا گیا ہے۔
ذرائع کے مطابق ایران کی جانب سے سب سے پہلی اور اہم شرط یہ رکھی گئی ہے کہ مستقبل میں دوبارہ جنگ شروع نہ ہونے کی مضبوط اور قابلِ عمل ضمانت فراہم کی جائے۔
دوسری شرط کے طور پر ایران نے خطے میں موجود امریکی فوجی اڈوں کی بندش کا مطالبہ کیا ہے، جسے خطے میں کشیدگی کی بڑی وجہ قرار دیا جا رہا ہے۔
تیسری شرط میں ایران نے مطالبہ کیا ہے کہ جارح قوتوں کو پیچھے دھکیلا جائے اور ایران کو جنگی نقصانات کے ازالے کے لیے ہرجانہ ادا کیا جائے۔
چوتھی شرط کے مطابق ایران چاہتا ہے کہ خطے کے تمام محاذوں پر جاری لڑائی مکمل طور پر ختم کی جائے تاکہ مستقل امن کی راہ ہموار ہو سکے۔
پانچویں شرط میں آبنائے ہرمز کے لیے ایک نیا قانونی نظام نافذ کرنے کا مطالبہ شامل ہے، تاکہ عالمی تجارت اور تیل کی ترسیل کو محفوظ بنایا جا سکے۔
آخری شرط کے طور پر ایران نے اپنے خلاف کام کرنے والے میڈیا آپریٹیوز کے خلاف قانونی کارروائی اور انہیں ملک بدر کرنے کا مطالبہ بھی کیا ہے۔
ذرائع کا کہنا ہے کہ ان شرائط کو مختلف ثالثی کردار ادا کرنے والے ممالک کے ذریعے آگے بڑھایا جا رہا ہے، تاہم ابھی تک ان پر کسی حتمی پیش رفت کی تصدیق سامنے نہیں آئی۔
تجزیہ کاروں کے مطابق ایران کی یہ شرائط نہایت سخت اور جامع ہیں، جنہیں قبول کرنا مخالف فریق کے لیے آسان نہیں ہوگا، تاہم یہ مطالبات خطے میں طویل المدتی امن کے لیے ایران کے مؤقف کی عکاسی کرتے ہیں۔
