خلیج اردو
اسپین کے شمالی علاقوں میں بدھ کی شام ایک نایاب مکمل سورج گرہن کے دوران دن چند لمحوں کے لیے رات میں تبدیل ہو گیا، جسے دیکھنے کے لیے لاکھوں افراد جمع ہوئے۔
مدرید کے شمال میں واقع بویتراگو دے لوزویا میں گرہن کے دوران آسمان پر مکمل تاریکی چھا گئی تو تماشائی خوشی سے تالیاں بجاتے اور نعرے لگاتے نظر آئے۔ سورج گرہن کے دوران "بیلیز بیڈز” اور "ڈائمنڈ رنگ” جیسے دلکش مناظر نے حاضرین کو مسحور کر دیا۔
عینی شاہدین کا کہنا تھا کہ مکمل گرہن کے بعد آسمان کے رنگ آہستہ آہستہ واپس آنے لگے، پہلے سرخ اور پھر نیلے رنگ نمایاں ہوئے، جس سے ایسا محسوس ہوا جیسے سورج دوبارہ طلوع ہو رہا ہو۔
اسپین اور آئس لینڈ میں لاکھوں افراد نے گزشتہ 27 برس کے دوران مغربی یورپ کے پہلے مکمل سورج گرہن کا مشاہدہ کیا۔ آئس لینڈ میں بادلوں کے باعث کئی علاقوں میں گرہن واضح طور پر دکھائی نہیں دیا، تاہم مغربی ساحلی علاقوں میں مکمل تاریکی کا منظر دیکھا گیا۔
حکام کے مطابق اسپین میں تقریباً 60 لاکھ افراد کے مختلف علاقوں میں پہنچنے کی توقع تھی۔ سیکیورٹی کے لیے 25 ہزار سے زائد پولیس اہلکار تعینات کیے گئے جبکہ تقریباً 100 طیاروں اور ہیلی کاپٹروں کو ہنگامی حالات سے نمٹنے کے لیے تیار رکھا گیا۔
اسپین میں آخری مرتبہ 1912 میں مکمل سورج گرہن دیکھا گیا تھا، جبکہ اگلا مکمل سورج گرہن 2 اگست 2027 کو متوقع ہے۔ 2028 میں حلقہ نما سورج گرہن بھی دیکھا جائے گا، جسے ماہرین نے "آئبیریئن ایکلیپس ٹریو” کا نام دیا ہے۔
گرہن کے دوران جنگلات میں آگ لگنے کے خدشات کے باعث حکام نے خصوصی حفاظتی اقدامات کیے۔ ایک مقام پر گاڑی میں لگنے والی آگ نے مزید 33 گاڑیوں کو اپنی لپیٹ میں لے لیا، تاہم فائر فائٹرز نے صورت حال پر قابو پا لیا۔
مشہور برطانوی راک بینڈ کوئین کے سابق گٹارسٹ Brian May بھی اس تاریخی منظر کے مشاہدے کے لیے اسپین پہنچے اور اس یادگار لمحے کو اپنے سوشل میڈیا اکاؤنٹ پر شیئر کیا۔
