خلیج اردو
دبئی: دبئی انٹرنیشنل ایئرپورٹ پر امیگریشن کا عمل اب صرف چھ سیکنڈز میں مکمل کیا جا رہا ہے۔ ٹرمینل 3 میں متعارف کرایا گیا نیا اے آئی پاورڈ اسمارٹ کوریڈور بغیر پاسپورٹ دکھائے یا کاؤنٹر پر رکے، مسافروں کو کلیئر کر دیتا ہے۔
خلیج ٹائمز کی ٹیم نے سفر کے رش کے دوران اس نظام کا تجربہ کیا اور بغیر کسی دستاویز یا پاسپورٹ اسکین کے باآسانی امیگریشن سے گزر گئی۔ مسافر صرف ریڈ کارپٹ پر چلتے ہیں اور جدید سینسر ان کے چہرے کو اسکین کر لیتے ہیں۔ چند قدم بعد اسکرین پر “امیگریشن مکمل” کا پیغام ان کی تصویر، فلائٹ کی تفصیل اور وقت کے ساتھ ظاہر ہو جاتا ہے۔ اگر کوئی کیس فلیگ ہو جائے تو مسافروں کو مزید چیکنگ کے لیے الگ سمت بھیج دیا جاتا ہے۔
بعض مسافروں نے عادتاً پاسپورٹ نکالنے کی کوشش کی لیکن امیگریشن اہلکاروں نے انہیں آگے بڑھنے کا اشارہ دیا۔ اس تیز رفتار اور منفرد عمل نے پہلی بار استعمال کرنے والوں کو حیران کر دیا۔
یہ نظام بیک وقت 10 مسافروں کو پروسیس کرنے کی صلاحیت رکھتا ہے اور بزرگ افراد یا وہیل چیئر استعمال کرنے والے مسافروں کے لیے بھی بالکل سہل ہے۔ حکام کے مطابق یہ ٹیکنالوجی نہ صرف رفتار میں اضافہ کرے گی بلکہ سیکیورٹی کو بھی بہتر بنائے گی کیونکہ یہ مشکوک پاسپورٹس کو خودکار طریقے سے ماہرین کے پاس بھیج دیتی ہے۔
لیفٹیننٹ جنرل محمد احمد المری، ڈائریکٹر جنرل جی ڈی آر ایف اے دبئی کے مطابق یہ منصوبہ بتدریج پورے ایئرپورٹ، بشمول آمد کے حصوں تک پھیلایا جائے گا۔ مستقبل میں دبئی ورلڈ سینٹرل (المکتوم انٹرنیشنل ایئرپورٹ) پر بھی ایسا ہی کوریڈور متعارف کرایا جائے گا، جہاں مسافر خودکار بیگیج ہینڈلنگ اور یہاں تک کہ eVTOL ایئرکرافٹ کے ذریعے بھی پہنچ سکیں گے۔
2024 میں دبئی انٹرنیشنل ایئرپورٹ دنیا کا سب سے مصروف بین الاقوامی مسافروں کا مرکز رہا۔ اب یہ نیا اسمارٹ کوریڈور امیگریشن جیسے دباؤ والے عمل کو ایک آسان، ہموار اور چند قدموں کی مسافت میں مکمل ہونے والے تجربے میں بدل رہا ہے۔
