خلیج اردو
متحدہ عرب امارات کے صدر شیخ محمد بن زاید النہیان نے کہا ہے کہ ملک کی دفاعی صلاحیتوں کو مضبوط بنانا ریاست کی اہم ترین ترجیح رہے گی تاکہ قومی سلامتی اور استحکام کو یقینی بنایا جا سکے۔
یہ بیان مسلح افواج کے اتحاد کی پچاسویں سالگرہ کے موقع پر سامنے آیا، جو 6 مئی 1976 کو بانی رہنما شیخ زاید بن سلطان النہیان اور دیگر حکمرانوں کے وژن کے تحت عمل میں آیا تھا۔
صدر نے اپنے پیغام میں مسلح افواج کی خدمات کو خراج تحسین پیش کرتے ہوئے کہا کہ افواج نے ماضی، حال اور حالیہ چیلنجز میں غیر معمولی کارکردگی کا مظاہرہ کیا ہے اور قومی دفاع میں کلیدی کردار ادا کیا ہے۔
انہوں نے کہا کہ حالیہ ایرانی حملوں کے دوران شہریوں اور اہم تنصیبات کے تحفظ میں افواج نے جرات اور پیشہ ورانہ مہارت کا مظاہرہ کیا، جو ملکی تاریخ میں سنہری حروف سے لکھا جائے گا۔
شیخ محمد بن زاید کا کہنا تھا کہ جدید دفاعی صنعت اور طویل المدتی حکمت عملی نے افواج کو مضبوط بنایا ہے، اور یہ صلاحیتیں مستقبل میں بھی ریاست کیلئے حفاظتی ڈھال کا کردار ادا کرتی رہیں گی۔
انہوں نے اس بات پر زور دیا کہ متحدہ عرب امارات اپنی خودمختاری، سلامتی اور عوام کے تحفظ کیلئے ہر خطرے کا بھرپور جواب دینے کی صلاحیت رکھتا ہے۔
یہ بیان اس عزم کی عکاسی کرتا ہے کہ امارات اپنی دفاعی تیاریوں کو مزید مضبوط بنا کر نہ صرف موجودہ خطرات کا مقابلہ کرے گا بلکہ مستقبل کی چیلنجز کیلئے بھی تیار رہے گا۔
