خلیج اردو
متحدہ عرب امارات میں ایک نیا ڈیجیٹل اقدام شروع کیا گیا ہے جس کے تحت شہری اور رہائشی آن لائن “یو اے ای نیشنل پلیج” پر دستخط کر کے ملک اور اس کی قیادت کے لیے اپنی حمایت اور اظہارِ تشکر پیش کر سکتے ہیں۔
یہ اقدام غیر منافع بخش تنظیم صندووق الوطن کی جانب سے شروع کیا گیا ہے جو ارث زاید فلاحی اداروں کے تحت کام کرتی ہے۔ اس کا مقصد مختلف قومیتوں اور زبانوں سے تعلق رکھنے والے افراد کو ایک پلیٹ فارم پر اکٹھا کرنا اور متحدہ عرب امارات کی قیادت کے لیے یکجہتی کا اظہار کرنا ہے۔
پلیج پر دستخط کرنے کے لیے صارفین کو سرکاری ویب سائٹ pledge.ae پر جانا ہوتا ہے، جہاں یہ پلیٹ فارم عربی، اردو، بنگالی، ملیالم، چینی اور فلپائنی سمیت متعدد زبانوں میں دستیاب ہے۔
صارفین اپنا نام اور ای میل درج کرتے ہیں اور “کلک اینڈ پارٹیسپیٹ وِد پرائیڈ” کے بٹن پر کلک کر کے اس مہم کا حصہ بن سکتے ہیں۔ یہ عمل بالکل مفت اور ڈیجیٹل ہے۔
حکام کے مطابق اس پلیج میں ہر شہری اور رہائشی شامل ہو سکتا ہے، اور ایک فرد اپنے ساتھ زیادہ سے زیادہ 10 اہل خانہ کے نام بھی شامل کر سکتا ہے۔
منتظمین کا کہنا ہے کہ یہ اقدام چار بنیادی اصولوں پر مبنی ہے جن میں قیادت کے لیے شکرگزاری اور قدر دانی، قومی اقدار کی پیروی، معاشرتی ہم آہنگی اور آنے والی نسلوں کے لیے ایک مستقل ورثہ شامل ہیں۔
پلیج مکمل کرنے کے بعد صارف کو ایک ڈیجیٹل سرٹیفکیٹ بھی دیا جاتا ہے جسے ڈاؤن لوڈ اور شیئر کیا جا سکتا ہے، اور یہ سرٹیفکیٹ لینڈ اسکیپ اور پورٹریٹ دونوں فارمیٹس میں دستیاب ہوتا ہے۔
یہ اقدام یو اے ای میں رہنے والے مختلف پس منظر کے افراد کے درمیان اتحاد اور قومی وابستگی کو فروغ دینے کی ایک نئی ڈیجیٹل کوشش کے طور پر دیکھا جا رہا ہے۔
