یو اے ای کی وارننگ، فلیائنگ ٹائیگر کے گلاس کپ میں خطرناک دھاتوں کی موجودگی کا انکشاف، فوری استعمال بند کرنے کی ہدایت جاری

خلیج اردو
متحدہ عرب امارات کی وزارتِ معیشت اور سیاحت نے صارفین کو خبردار کیا ہے کہ وہ برانڈ Flying Tiger Copenhagen کے 220 ملی لیٹر گلاس ڈرنکنگ کپ کا استعمال فوری طور پر بند کر دیں۔

حکام کے مطابق یہ انتباہ اس وقت جاری کیا گیا جب معائنے میں انکشاف ہوا کہ ان کپوں پر موجود بیرونی پرنٹ میں سیسے اور کیڈمیم کی خطرناک حد تک زیادہ مقدار پائی گئی ہے، جو صحت کے لیے نقصان دہ ہو سکتی ہے۔

متعلقہ مصنوعات کے نمبر 3057450، 3060031، 3052986، 3062993، 3055350 اور 3053912 بتائے گئے ہیں۔

وزارت نے ہدایت دی ہے کہ متاثرہ مصنوعات کو فوری طور پر استعمال سے ہٹا کر تلف کر دیا جائے تاکہ کسی ممکنہ صحت کے خطرے سے بچا جا سکے۔

حکام کے مطابق یہ اقدام مارکیٹ کی نگرانی اور صارفین کے تحفظ کے لیے کیے جانے والے مسلسل اقدامات کا حصہ ہے۔

اس سے قبل سعودی عرب کی وزارتِ تجارت نے بھی اسی برانڈ کے ہزاروں گلاس کپ واپس منگوانے کا اعلان کیا تھا اور ممکنہ صحت کے خطرات سے خبردار کیا تھا۔

تجزیہ کاروں کے مطابق اس طرح کے اقدامات خلیجی ممالک میں مصنوعات کے معیار اور صارفین کی حفاظت کے سخت نظام کی عکاسی کرتے ہیں۔