بھارت پاکستان میچ دیکھنے کیلئے یو اے ای شائقین کے ہزاروں درہم خرچ

رپورٹ کے مطابق Dubai سے کولمبو کیلئے واپسی کے ہوائی ٹکٹ میچ کے دنوں میں اوسطاً 3 ہزار 700 درہم تک جا پہنچے ہیں، جبکہ روانگی اور واپسی کی تاریخ کے لحاظ سے کرایوں میں مسلسل اضافہ دیکھا جا رہا ہے۔

جمعہ کو براہِ راست روانگی کی صورت میں یکطرفہ کرایہ تقریباً 1 ہزار 680 درہم جبکہ تین روز بعد واپسی کا ٹکٹ 1 ہزار 200 درہم تک ہے۔ ہفتہ کو روانہ ہونے والوں کیلئے کرایہ 2 ہزار درہم جبکہ منگل واپسی کا ٹکٹ 1 ہزار 600 درہم کے قریب بتایا گیا ہے۔

دبئی میں مقیم پاکستانی بزنس مین جہانزیب نے کہا، “میں ہمیشہ کوشش کرتا ہوں کہ بھارت پاکستان کا میچ اسٹیڈیم میں بیٹھ کر دیکھوں، کیونکہ وہاں کا ماحول بالکل مختلف ہوتا ہے۔”

انہوں نے چند روز قبل 2 ہزار 300 درہم میں واپسی کا ٹکٹ خریدا جبکہ مرکزی کولمبو میں تین راتوں کیلئے ہوٹل بکنگ پر تقریباً 2 ہزار 200 درہم خرچ کیے۔ موجودہ فہرست کے مطابق میچ ویک اینڈ پر چار روزہ قیام کیلئے فائیو اسٹار ہوٹل کا کرایہ 1 ہزار 800 سے 4 ہزار درہم کے درمیان ہے۔

میچ ٹکٹوں کی قیمت نشست کے لحاظ سے مختلف ہے تاہم درمیانے درجے کی نشستیں 400 سے 600 درہم میں دستیاب ہیں، جبکہ مقامی ٹرانسپورٹ، ایئرپورٹ ٹرانسفر اور کھانے پینے سمیت دیگر اخراجات مزید 600 سے 800 درہم تک بڑھ سکتے ہیں۔

ٹریول ایجنٹس کے مطابق آسان ویزا پالیسی اور میچ سے قبل مختصر چھٹی گزارنے کے رجحان کے باعث دونوں ممالک کے شائقین کی جانب سے غیر معمولی دلچسپی دیکھی جا رہی ہے، جس سے کولمبو میں سیاحت کو عارضی فروغ ملنے کا امکان ہے۔