خلیج اردو
متحدہ عرب امارات کے مختلف علاقوں میں حالیہ بارش نے کئی مقامات پر دو سال کے برابر پانی برسا دیا، تاہم ماہرین کے مطابق اس بار طوفان کی شدت 2024 کے ریکارڈ توڑ واقعے سے کم رہی۔
محکمہ موسمیات کے ماہرین کے مطابق اس بار بارش ایک ہی دن میں نہیں بلکہ پانچ سے چھ دنوں میں وقفے وقفے سے ہوتی رہی، جس کی وجہ سے اس کے اثرات نسبتاً کم شدید رہے۔ اس کے برعکس 2024 میں یہی مقدار مختصر وقت میں برسی تھی جس سے شدید سیلابی صورتحال پیدا ہوئی تھی۔
ماہر موسمیات ڈاکٹر احمد حبیب کے مطابق یہ بارش مختلف فضائی نظاموں کے امتزاج سے ہوئی، جس میں بحیرہ عرب سے آنے والا کم دباؤ اور بالائی فضاء میں موجود سسٹم شامل تھا، جس نے مسلسل بارش کا سلسلہ جاری رکھا۔
انہوں نے واضح کیا کہ اس دوران کلاؤڈ سیڈنگ نہیں کی گئی اور یہ مکمل طور پر قدرتی موسمی نظام کا نتیجہ تھا۔
رپورٹ کے مطابق بارش کا سلسلہ مغربی علاقوں سے شروع ہو کر ابو ظہبی، الظفرہ، العین، دبئی اور راس الخیمہ تک پھیل گیا، جبکہ درجہ حرارت میں بھی نمایاں کمی دیکھی گئی۔
ماہرین نے پیشگوئی کی ہے کہ آئندہ دنوں میں بھی مطلع ابر آلود رہے گا اور کہیں کہیں ہلکی سے درمیانی جبکہ بعض علاقوں میں تیز بارش کا امکان ہے، خاص طور پر العین اور دبئی کے درمیان علاقوں میں۔
حکام نے شہریوں کو خبردار کیا ہے کہ تیز ہواؤں اور خراب سمندری حالات کے باعث احتیاطی تدابیر اختیار کریں، خاص طور پر ماہی گیر اور ساحلی علاقوں کے رہائشی محتاط رہیں۔
ماہرین کے مطابق موسم بہار میں اس نوعیت کی غیر مستحکم موسمی صورتحال غیر معمولی نہیں اور ماضی میں بھی 2004، 2016 اور 2019 میں ایسے واقعات پیش آ چکے ہیں۔
تجزیہ کاروں کے مطابق بارش کی تقسیم شدہ نوعیت نے ممکنہ بڑے نقصان سے بچاؤ میں اہم کردار ادا کیا، جو اس بار ایک مثبت پہلو کے طور پر سامنے آیا۔
