خلیج اردو
عیدالاضحیٰ کی نو روزہ تعطیلات کے بعد یکم جون سے متحدہ عرب امارات بھر میں ہزاروں طلبہ دوبارہ اسکولوں کا رخ کریں گے۔ طلبہ کے لیے تعطیلات کی تفریح، خاندانی ملاقاتوں اور آرام کے بعد ایک بار پھر تعلیمی سرگرمیوں اور معمولاتِ زندگی میں واپسی کا مرحلہ شروع ہو رہا ہے۔
مختلف تعلیمی اداروں نے طلبہ کی واپسی کے لیے الگ الگ حکمت عملی اختیار کی ہے۔ بعض اسکول پہلے ہفتے میں طلبہ کو تدریجی انداز میں تعلیمی ماحول سے ہم آہنگ کرنے کے لیے نظرثانی کلاسوں، مباحثوں اور سرگرمیوں کا اہتمام کریں گے، جبکہ بعض اداروں میں واپسی کے فوراً بعد باقاعدہ امتحانات اور تشخیصی ٹیسٹ شروع کیے جائیں گے۔
Dewvale School Dubai کی پرنسپل سیما عمر کے مطابق پہلے ہفتے کا مقصد طلبہ کو خوشگوار انداز میں دوبارہ تعلیمی ماحول سے جوڑنا ہے۔ اس دوران طلبہ کو اپنی تعطیلات کے تجربات شیئر کرنے کا موقع بھی دیا جائے گا جبکہ کسی قسم کے امتحانات یا تشخیصی سرگرمیاں نہیں ہوں گی۔
انہوں نے والدین پر بھی زور دیا کہ وہ بچوں کی نیند، وقت کی پابندی اور حاضری کے معمولات بحال کرنے میں مدد کریں تاکہ طلبہ تازہ دم ہو کر اسکول واپس آئیں۔
دوسری جانب Credence High School میں عید کی تعطیلات کے فوراً بعد باقاعدہ امتحانات کا آغاز کیا جا رہا ہے۔ ادارے کی سربراہ دیپیکا تھاپر سنگھ کے مطابق امتحانات کا شیڈول پہلے ہی طلبہ اور والدین کے ساتھ شیئر کیا جا چکا ہے، اس لیے کسی غیر متوقع صورتحال کا سامنا نہیں ہوگا۔
انہوں نے کہا کہ امتحانات نصاب کے محدود حصے پر مشتمل ہیں اور اگر طلبہ تعطیلات کے دوران روزانہ ایک گھنٹہ بھی توجہ کے ساتھ نظرثانی کرتے رہے ہوں تو وہ آسانی سے بہتر کارکردگی دکھا سکتے ہیں۔
ماہرین تعلیم کے مطابق تعطیلات کے بعد طلبہ کو دوبارہ تعلیمی ماحول میں لانے کے لیے متوازن حکمت عملی ضروری ہے تاکہ وہ ذہنی دباؤ کے بغیر اپنی پڑھائی پر توجہ مرکوز کر سکیں۔
