متحدہ عرب امارات میں موسم: شدید دھند کے باعث سرخ اور زرد الرٹس جاری، بعض علاقوں میں بارش کا امکان

خلیج اردو
ابوظہبی: نیشنل سینٹر آف میٹورولوجی  کے مطابق متحدہ عرب امارات میں آج موسم عمومی طور پر صاف رہے گا، تاہم مشرقی علاقوں میں بننے والے کنویکشنل بادلوں کے باعث کچھ مقامات پر ہلکی بارش ہونے کا امکان ہے۔

گزشتہ تین دنوں کے دوران عید الاضحیٰ کی طویل تعطیلات کے دوران مختلف امارات میں ہلکی سے شدید بارشیں ہوئیں، جن کے نتیجے میں متعدد مقامات پر پانی کے بہاؤ اور عارضی آبشاریں دیکھنے میں آئیں۔ پیر کے روز شارجہ کے ملیحہ، فجیرہ کے مسافی، اور راس الخیمہ کے سہیلہ علاقوں میں بارش ریکارڈ کی گئی۔

محکمۂ موسمیات نے آج بروز منگل صبح 4 بجے سے 9 بجے کے درمیان شدید دھند کے باعث بعض ساحلی و اندرونی علاقوں کے لیے سرخ اور زرد الرٹس جاری کیے ہیں۔ دھند کے سبب افقی حدِ نگاہ میں نمایاں کمی متوقع ہے۔

موسم کی اگلی صورتحال کے حوالے سے ادارے کا کہنا ہے کہ رات اور بدھ کی صبح کے دوران موسم مرطوب رہے گا، جس سے بعض ساحلی اور اندرونی علاقوں میں ہلکی دھند یا کہر بننے کا امکان ہے۔

جنوب مشرقی سے شمال مشرقی سمت میں ہلکی سے معتدل ہوائیں چلیں گی، جو دن کے وقت گرد و غبار اٹھا سکتی ہیں۔ ان کی رفتار 10 سے 25 کلومیٹر فی گھنٹہ جبکہ زیادہ سے زیادہ رفتار 40 کلومیٹر فی گھنٹہ تک ہو سکتی ہے۔

عربین گلف اور بحیرہ عمان میں سمندر کی کیفیت معمولی درجے کی رہے گی۔