یو اے ای میں موسم کی شدت برقرار، موسلا دھار بارش کے لیے اورنج الرٹ جاری، آندھی، ژالہ باری اور بجلی چمکنے کی پیش گوئی

خلیج اردو
یو اے ای میں غیر مستحکم موسمی صورتحال جمعہ 18 دسمبر کو بھی برقرار رہنے کا امکان ہے، کیونکہ خطے کو متاثر کرنے والا کم دباؤ کا نظام مغرب کی جانب بڑھتے ہوئے ملک کے مزید حصوں کو اپنی لپیٹ میں لے رہا ہے۔ نیشنل سینٹر آف میٹرولوجی نے مغربی اور ساحلی علاقوں بشمول فجیرہ کے لیے موسلا دھار بارش کے پیش نظر اورنج الرٹ جاری کر دیا ہے، جہاں گرج چمک کے بادلوں کے باعث شدید بارش متوقع ہے۔
محکمہ موسمیات کے مطابق تیز ہوائیں گرد و غبار اور ریت اڑنے کا سبب بن سکتی ہیں، جس کے نتیجے میں افقی حدِ نگاہ متاثر ہونے کا خدشہ ہے، جبکہ یہ الرٹ جمعہ سہ پہر چار بجے تک نافذ رہے گا۔ حکام نے مزید بتایا ہے کہ ملک کے مختلف حصوں میں آندھی، بجلی چمکنے اور ژالہ باری کا بھی امکان ہے، اور بارش کی شدت علاقے کے لحاظ سے مختلف ہو سکتی ہے۔
محکمہ موسمیات نے درجہ حرارت میں نمایاں کمی کی پیش گوئی بھی کی ہے، جہاں ابوظہبی میں پارہ 17 سے 22 ڈگری سینٹی گریڈ، دبئی میں 16 سے 23 ڈگری اور شارجہ میں 15 سے 21 ڈگری سینٹی گریڈ کے درمیان رہنے کا امکان ہے۔
جنوب مشرق سے شمال مغرب کی جانب چلنے والی معتدل سے تیز ہوائیں بعض اوقات 85 کلومیٹر فی گھنٹہ تک کی رفتار اختیار کر سکتی ہیں، جب کہ خلیج عرب میں سمندر کی صورتحال بعض اوقات انتہائی خراب اور بحیرہ عمان میں خراب رہنے کی توقع ظاہر کی گئی ہے، اس دوران شہریوں کو احتیاط برتنے اور سرکاری ہدایات پر عمل کرنے کا مشورہ دیا گیا ہے۔