خلیج اردو
ابوظہبی / دبئی: عید الاضحیٰ 2025 متحدہ عرب امارات میں کئی خاندانوں کے لیے دوہری خوشی کا باعث بنی، جب انہیں اس بابرکت دن کی اولین ساعتوں میں اولاد کی نعمت نصیب ہوئی۔ جیسے ہی شہر کی فضاؤں میں عید کی تکبیر گونجی، کئی والدین نے اپنی زندگی کے سب سے یادگار لمحات کا آغاز کیا۔
سب سے پہلا عید کا بچہ 6 جون 2025 کی صبح 1:39 بجے ن ایم سی رائل ہسپتال، ابوظہبی میں پیدا ہوا۔ اردنی والدین کو قدرت نے ایک صحت مند بیٹی سے نوازا جو 3.56 کلوگرام وزن کے ساتھ قدرتی طریقے سے پیدا ہوئی۔ نومولود بچی، سیلا، ریہاف محمد منصور اور ان کے شوہر ابراہیم عبدل کی بارہویں اولاد ہے۔ ریہاف نے خوشی کا اظہار کرتے ہوئے کہا: "میری عید کا تحفہ میری بیٹی ہے، میں بہت شکر گزار ہوں۔”
دبئی میں بھارتی نژاد جوڑے نکیتا پریش وڈکا اور یوگیش کو بھی 1:54 بجے پرائم ہسپتال دبئی میں بیٹے کی پیدائش کا تحفہ ملا۔ نومولود کا وزن 2.9 کلوگرام رہا۔ جوڑے نے بتایا: "یہ ہمارا پہلا بچہ ہے اور اس خاص دن پر اس کی آمد ہمارے لیے ایک نعمت ہے۔”
ایسٹر ہسپتال القصیص میں بھی ایک بیٹے کی پیدائش ہوئی جسے والدین "ہنینہ کا بچہ” کہہ کر پکار رہے ہیں۔ منصور علی اور ہنینہ سیتھماراکاتھو لانچیرا پورائیل نے اپنے بیٹے کو صبح 4:39 پر خوش آمدید کہا۔ جوڑے نے کہا: "یہ لمحہ ہماری زندگی کا سب سے خاص لمحہ بن گیا ہے۔ ہم ڈاکٹروں اور طبی ٹیم کے بے مثال تعاون پر ان کے شکر گزار ہیں۔”
بعد ازاں، ن ایم سی اسپیشلٹی ہسپتال میں ایک اور بچے کی پیدائش ہوئی۔ ایتھوپین والدین چی کیڈیس ٹسفائے اور ان کے شوہر وونگوسن جریجے اریا کو 3.680 کلوگرام وزنی بیٹے سے نوازا گیا۔ بچے کی پیدائش سیزیرین سیکشن کے ذریعے ڈاکٹر سونیتا گپتا کی زیر نگرانی ہوئی۔ ڈاکٹر نے کہا: "مبارک عید! اس خاص موقع پر بچے کی آمد پر خوشی محسوس کر رہی ہوں، ان کے لیے ڈھیروں خوشیوں کی دعا ہے۔
