متحدہ عرب امارات نے اخوان المسلمون کی کئی شاخوں کو دہشت گرد تنظیمیں قرار دینے کے امریکی فیصلے کا خیر مقدم کیا ہے۔

ابوظبی سے جاری بیان میں امارات کی وزارتِ خارجہ و بین الاقوامی تعاون نے کہا کہ امریکی اقدام صدر ڈونلڈ ٹرمپ کی انتظامیہ کی جانب سے تشدد اور عدم استحکام پھیلانے والی سرگرمیوں کے خلاف جاری منظم اور مسلسل کوششوں کی عکاسی کرتا ہے، جو اخوان المسلمون کی دہشت گرد شاخوں کی طرف سے انجام دی جاتی ہیں۔

وزارت نے مزید کہا کہ یہ فیصلہ ان شاخوں کو ان وسائل سے محروم کرنے کی سمت ایک اہم قدم ہے جو انہیں انتہاپسندی، نفرت اور دہشت گردی کی حمایت یا اس کے جواز پیش کرنے کے قابل بناتے ہیں۔

بیان میں متحدہ عرب امارات نے دہشت گردی اور انتہاپسندی کے خاتمے کے لیے بین الاقوامی کوششوں کی مکمل حمایت کا اعادہ کیا اور علاقائی و عالمی امن و استحکام کے فروغ پر زور دیا۔