خلیج اردو
خلیج ٹائمز یونی ایکسپو کے پہلے روز تقریباً ایک ہزار 100 طلبہ کی شرکت کے بعد بدھ کو ایونٹ کے دوسرے روز تقریباً ایک ہزار 500 طلبہ کی آمد متوقع ہے۔ دوسرے روز طلبہ کو یونیورسٹیوں کے بروشرز کے ساتھ مختلف ڈگری پروگرامز، کیریئر، ملازمت کے مواقع، طلبہ کی زندگی، داخلوں اور متحدہ عرب امارات سمیت بیرون ملک تعلیم کے مختلف راستوں سے متعلق معلومات فراہم کی جائیں گی۔
یونی ایکسپو میں ہونے والی گفتگو سے ظاہر ہوتا ہے کہ طلبہ اور والدین اب صرف یہ جاننے میں دلچسپی نہیں رکھتے کہ کون سی ڈگری حاصل کی جاسکتی ہے، بلکہ یہ بھی جاننا چاہتے ہیں کہ اس ڈگری کے بعد عملی زندگی میں کون سے مواقع دستیاب ہوں گے۔ یونیورسٹیوں کے نمائندوں کے مطابق ادارے بھی طلبہ سے رابطے اور تعلیمی پروگرامز کی افادیت بیان کرنے کے طریقوں پر دوبارہ غور کر رہے ہیں۔
امارات ایوی ایشن یونیورسٹی کے ترجمان کے مطابق فال 2026 کے لیے داخلوں کا عمل پہلے سے زیادہ مصروف رہا اور انڈر گریجویٹ و پوسٹ گریجویٹ پروگرامز نے دنیا بھر سے طلبہ کو متوجہ کیا۔ یونیورسٹی میں انجینئرنگ، مینجمنٹ، مصنوعی ذہانت اور ڈیٹا سائنس سمیت مختلف پروگرامز موجود ہیں، جبکہ انڈر گریجویٹ طلبہ کے لیے ایک سمسٹر پر مشتمل انٹرن شپ کے مواقع بھی فراہم کیے جاتے ہیں تاکہ انہیں عملی تجربہ اور صنعت سے وابستہ ہونے کا موقع مل سکے۔
یونیورسٹی نمائندوں کے مطابق طلبہ اور والدین کی توجہ اب تعلیم کے نتائج، ملازمت کے امکانات، تعلیمی سرمایہ کاری سے حاصل ہونے والے فوائد اور مجموعی طلبہ تجربے پر بھی مرکوز ہے۔ اس رجحان کی عکاسی داخلوں کے اعدادوشمار سے بھی ہوتی ہے۔
روشسٹر انسٹی ٹیوٹ آف ٹیکنالوجی دبئی کی داخلہ ٹیم کے رکن ابوبکر خان نے بتایا کہ رواں سال طلبہ کے داخلوں میں 25 فیصد اضافہ ہوا ہے۔
یونی ایکسپو میں طلبہ طب اور انجینئرنگ سے لے کر فیشن ڈیزائن، جرائم شناسی اور ایوی ایشن سمیت مختلف شعبوں کے بارے میں معلومات حاصل کرسکتے ہیں۔ گلف ماڈل سکول دبئی کی گریڈ 12 کی طالبہ ناسنین فاطمہ نے بتایا کہ زیادہ تر طلبہ سائنس سے وابستہ ہیں اور میڈیکل و انجینئرنگ پروگرامز دیکھ رہے ہیں، تاہم بعض طلبہ فیشن ڈیزائن جیسے مختلف شعبوں میں بھی دلچسپی رکھتے ہیں۔
ناسنین کے مطابق وہ میڈیکل لیگل ایڈوائزنگ اور جرائم شناسی جیسے نسبتاً مختلف کیریئر آپشنز پر بھی غور کر رہی ہیں۔ ایک اور گریڈ 12 کی طالبہ نشوا محسن نے بتایا کہ وہ متحدہ عرب امارات کے ساتھ برطانیہ اور اسکاٹ لینڈ کی یونیورسٹیوں کو بھی دیکھ رہی ہیں اور ایوی ایشن، انجینئرنگ اور سائنس سے متعلق شعبوں میں دلچسپی رکھتی ہیں۔
یونی ایکسپو کے دوسرے روز دبئی جیم، جے ایس ایس، جی ایس ایس گرلز، انڈین اکیڈمی دبئی، امریکن انٹرنیشنل سکول، جرمن انٹرنیشنل سکول دبئی، بلومنگٹن اکیڈمی، جمیرہ بیکریولیٹ سکول، السلام کمیونٹی سکول اور انڈین انٹرنیشنل سکول شارجہ سمیت مختلف تعلیمی اداروں کے طلبہ کی شرکت متوقع ہے۔ طلبہ اور والدین متحدہ عرب امارات اور بیرون ملک یونیورسٹیوں، ڈگری پروگرامز اور کیریئر کے مختلف راستوں کا تقابلی جائزہ لینے کے ساتھ داخلہ ماہرین سے براہ راست سوالات بھی کرسکیں گے۔
