خلیج اردو
شارجہ کے الذید اسٹیشن سے اتحاد ریل کے ٹکٹوں کی بکنگ شروع ہوگئی ہے، جہاں مسافر 19 درہم سے ٹکٹ حاصل کرسکتے ہیں۔ بکنگ پلیٹ فارم پر الذید سے فجیرہ اور ابوظبی کے لیے براہ راست ٹرین سروسز دستیاب ہیں، جبکہ الذید سے فجیرہ کا سفر صرف 25 منٹ میں مکمل ہوگا۔
بکنگ پلیٹ فارم پر 30 ستمبر سے الذید اسٹیشن سے سفر کے لیے ٹکٹ دستیاب ہیں۔ الذید اور فجیرہ کے درمیان روزانہ دونوں سمتوں میں دو، جبکہ الذید اور ابوظبی کے درمیان بھی دونوں سمتوں میں دو ٹرین سروسز چلائی جارہی ہیں۔
الذید سے فجیرہ کے لیے پہلی ٹرین صبح 9 بج کر 41 منٹ پر روانہ ہوکر 10 بج کر 6 منٹ پر پہنچے گی۔ اس سفر کے لیے کمفرٹ کلاس کا کرایہ 19 درہم اور پریمیم کلاس کا کرایہ 49 درہم سے شروع ہوگا۔ دوسری ٹرین شام 7 بج کر 51 منٹ پر روانہ ہوکر 8 بج کر 16 منٹ پر فجیرہ پہنچے گی، جس کا کمفرٹ کرایہ 24 درہم اور پریمیم کرایہ 79 درہم سے شروع ہوگا۔
فجیرہ سے الذید کے لیے صبح 6 بج کر 5 منٹ پر روانہ ہونے والی ٹرین 6 بج کر 30 منٹ پر پہنچے گی، جبکہ شام 5 بج کر 17 منٹ پر روانہ ہونے والی ٹرین 5 بج کر 42 منٹ پر الذید پہنچے گی۔ دونوں سروسز کے کمفرٹ ٹکٹ 19 درہم سے شروع ہوتے ہیں، جبکہ پریمیم کلاس کے کرائے بالترتیب 49 اور 79 درہم سے شروع ہوں گے۔
الذید سے ابوظبی کا سفر ایک گھنٹہ 24 منٹ میں مکمل ہوگا۔ صبح 6 بج کر 32 منٹ پر روانہ ہونے والی ٹرین 7 بج کر 56 منٹ پر ابوظبی پہنچے گی، جس کا کمفرٹ کرایہ 69 درہم اور پریمیم کرایہ 149 درہم سے شروع ہوگا۔ شام 5 بج کر 44 منٹ کی سروس 7 بج کر 8 منٹ پر ابوظبی پہنچے گی، جس کا کمفرٹ کرایہ 59 درہم اور پریمیم کرایہ 179 درہم سے شروع ہوگا۔
ابوظبی سے الذید کے لیے صبح 8 بج کر 15 منٹ پر روانہ ہونے والی ٹرین 9 بج کر 39 منٹ پر پہنچے گی، جبکہ شام 6 بج کر 25 منٹ کی سروس 7 بج کر 49 منٹ پر الذید پہنچے گی۔ دونوں سروسز کے کمفرٹ کرائے بالترتیب 59 اور 69 درہم سے شروع ہوں گے۔
بکنگ پلیٹ فارم پر 30 ستمبر کے لیے الذید اور دبئی کے درمیان فی الحال کوئی ٹرین دستیاب نہیں۔ الذید اسٹیشن شارجہ کے مرکزی علاقے میں مراگبات کے مقام پر قائم ہے اور صبح 5 بجے سے رات 11 بجے تک ہفتے کے ساتوں دن فعال رہتا ہے۔
اسٹیشن پر نماز کی جگہ، انتظار گاہ، واش رومز، ابتدائی طبی امداد کا کمرہ، ٹکٹ مشین، معلومات و معاونت کی سہولت اور مسافروں کو اتارنے اور بٹھانے کے لیے مخصوص مقامات موجود ہیں۔ اسٹیشن تک پہنچنے اور وہاں سے روانگی کے لیے اوبر اور شارجہ ٹیکسی بھی دستیاب ہیں۔
اسٹیشن سے تقریباً 50 میٹر کے فاصلے پر اتحاد ریل کا بس اسٹاپ موجود ہے، جہاں سے ای آر ون المدّام بس اسٹیشن، ای آر ٹو السجا بس اسٹیشن اور ای آر تھری الجبیل بس اسٹیشن کے لیے بس سروسز دستیاب ہیں۔ اسٹیشن پر کار رینٹل سروس اور 26 پارکنگ اسپیسز بھی موجود ہیں، جن میں 19 عام گاڑیوں اور 7 الیکٹرک گاڑیوں کے لیے مختص ہیں۔ بکنگ پلیٹ فارم پر فی الحال نصف دن اور پورے دن کی پارکنگ فیس صفر درہم درج ہے، تاہم مسافروں کو ٹکٹ بک کرتے وقت پارکنگ کی دستیابی چیک کرنے کی ہدایت کی گئی ہے۔
الذید ایک سرسبز نخلستانی شہر کے طور پر بھی جانا جاتا ہے، جہاں کھجور کے باغات، زرخیز زرعی زمینیں اور اونٹ ریسنگ ٹریک موجود ہیں۔ حجر پہاڑوں کے دامن میں واقع یہ شہر روایتی زرعی ثقافت، آبپاشی کے نظام، مقامی بازار، مٹی کے برتنوں اور تازہ زرعی پیداوار کے لیے بھی مشہور ہے۔
