خلیج اردو
ابوظبی میں قائم خودمختار سرمایہ کاری ادارے مبادلہ نے سال 2025 کے دوران 40 مختلف سرمایہ کاری معاہدوں میں مجموعی طور پر 32.7 ارب ڈالر یعنی تقریباً 120 ارب درہم کی سرمایہ کاری کی، جس کے ساتھ وہ مسلسل دوسرے سال دنیا کا سب سے متحرک خودمختار دولت فنڈ بن گیا۔ یہ انکشاف عالمی ادارے گلوبل ایس ڈبلیو ایف کی جانب سے جاری کردہ 2026 کی سالانہ رپورٹ میں کیا گیا۔
رپورٹ کے مطابق اگرچہ سعودی عرب کے پبلک انویسٹمنٹ فنڈ نے 2025 میں مجموعی طور پر 36.2 ارب ڈالر کی سرمایہ کاری کے ساتھ سب سے بڑا سرمایہ کار ہونے کا اعزاز حاصل کیا، تاہم اس رقم کا تقریباً 80 فیصد حصہ سال کی سب سے بڑی واحد ڈیل ای اے اسپورٹس سے متعلق تھا، جبکہ مبادلہ کی سرمایہ کاری متعدد شعبوں اور درجنوں ڈیلز پر محیط رہی۔
گلوبل ایس ڈبلیو ایف کے اعداد و شمار کے مطابق مبادلہ 2025 میں مصنوعی ذہانت اور ڈیجیٹل انفراسٹرکچر کے شعبے میں بھی دنیا کا سب سے بڑا سرمایہ کار رہا۔ ادارے نے خالص مصنوعی ذہانت کے منصوبوں میں 4.9 ارب ڈالر جبکہ مجموعی ڈیجیٹل اثاثوں میں 12.9 ارب ڈالر کی سرمایہ کاری کی۔ رپورٹ میں بتایا گیا ہے کہ ڈیجیٹل شعبہ تین حصوں پر مشتمل ہے، جن میں ڈیجیٹل انفراسٹرکچر، ڈیٹا سینٹرز اور مصنوعی ذہانت شامل ہیں، جہاں 2025 کے دوران اے آئی میں سرمایہ کاری میں غیر معمولی اضافہ دیکھا گیا۔
سال 2025 کے اختتام پر یو اے ای کے سب سے بڑے سرکاری سرمایہ کاری اداروں میں اثاثوں کے حجم کے اعتبار سے ابو دھابی انویسٹمنٹ اتھارٹی سرفہرست رہی، جس کے زیرانتظام اثاثے 1.18 ٹریلین ڈالر تھے، جبکہ انویسٹمنٹ کارپوریشن آف دبئی، مبادلہ، اے ڈی کیو، امارات انویسٹمنٹ اتھارٹی، دبئی انویسٹمنٹ فنڈ اور دبئی ہولڈنگ بھی نمایاں اداروں میں شامل رہے۔
عالمی سطح پر رپورٹ میں بتایا گیا کہ خودمختار دولت فنڈز نے 2025 میں مجموعی طور پر 179.3 ارب ڈالر کی سرمایہ کاری کی، جو 2024 کے مقابلے میں 35 فیصد زیادہ تھی، تاہم ڈیلز کی تعداد میں 9 فیصد کمی ریکارڈ کی گئی۔ مشرق وسطیٰ کے سات بڑے خودمختار فنڈز، جنہیں گلف سیون کہا جاتا ہے، نے عالمی سطح پر خودمختار سرمایہ کاری کا 43 فیصد حصہ ڈالا، جو تاریخ کی بلند ترین سطح قرار دی گئی۔
رپورٹ میں مزید بتایا گیا کہ 2025 میں بھی دنیا کی 15 بڑی ڈیلز محدود تعداد میں بڑے عالمی سرمایہ کاروں نے مکمل کیں، جن میں گلف سیون، کینیڈا کے میپل ایٹ اور سنگاپور کے ادارے شامل تھے، جبکہ ناروے اور نیدرلینڈز کے بڑے فنڈز نے بھی نمایاں بین الاقوامی معاہدوں میں حصہ لیا۔
