خلیج اردو
سیول: جنوبی کوریا کی معروف مصنفہ بیک سی ہی، جن کی خودنوشت *”آئی وانٹ ٹو ڈائی بٹ آئی وانٹ ٹو ایٹ ٹوئک بوکی”* نے دنیا بھر میں لاکھوں قارئین کے دل جیتے، 35 برس کی عمر میں انتقال کر گئیں۔
بیک سی ہی کی یہ یادداشت 2018 میں شائع ہوئی تھی، جس میں انہوں نے اپنے معالج کے ساتھ ہونے والی گفتگو کے ذریعے ڈپریشن سے اپنی جدوجہد کو نہایت سچائی اور سادگی سے بیان کیا۔ کتاب کا عنوان، جو کوریائی کھانے *ٹوئک بوکی* سے ماخوذ ہے، زندگی کی تلخیوں کے باوجود چھوٹے خوشگوار لمحوں کی اہمیت کو اجاگر کرتا ہے۔
یہ کتاب ابتدا میں کوریائی زبان میں لکھی گئی تھی لیکن 2022 میں انگریزی میں ترجمہ ہونے کے بعد عالمی سطح پر بے حد مقبول ہوئی، ایک ملین سے زائد کاپیاں فروخت ہوئیں اور اسے 25 زبانوں میں ترجمہ کیا گیا۔
کتاب کے مترجم اینٹن ہر نے انسٹاگرام پر خراجِ عقیدت پیش کرتے ہوئے لکھا:
"بیک سی ہی، جنہوں نے *آئی وانٹ ٹو ڈائی بٹ آئی وانٹ ٹو ایٹ ٹوئک بوکی* لکھی، انتقال کر گئی ہیں۔ وہ 35 برس کی تھیں۔ کورین آرگن ڈونیشن اتھارٹی کے مطابق، انہوں نے اپنے دل، پھیپھڑوں، جگر اور دونوں گردوں کے عطیے سے پانچ زندگیاں بچائیں۔ لیکن ان کے قارئین جانتے ہیں کہ ان کی تحریروں نے لاکھوں دلوں کو زندگی بخشی۔ میری دعائیں ان کے اہلِ خانہ کے ساتھ ہیں۔”
