خلیج اردو
راولپنڈی، 20 مئی 2025:
پاکستان میں تعینات چینی سفیر جناب جیانگ زائی ڈونگ نے ایئر ہیڈکوارٹرز اسلام آباد کا دورہ کیا جہاں انہوں نے پاک فضائیہ کے سربراہ ایئر چیف مارشل ظہیر احمد بابر سدھو سے ملاقات کی۔ ملاقات کے دوران دونوں معزز شخصیات نے باہمی دفاعی تعاون، ادارہ جاتی سطح پر روابط اور خطے میں بدلتی ہوئی جیو اسٹریٹیجک صورتحال پر تفصیلی تبادلہ خیال کیا۔
ایئر چیف نے چینی سفیر کا پرتپاک خیر مقدم کرتے ہوئے پاکستان اور چین کے درمیان تاریخی اور آزمودہ تعلقات پر روشنی ڈالی، جو باہمی اعتماد، اسٹریٹیجک ہم آہنگی اور علاقائی امن و استحکام کے مشترکہ عزم پر قائم ہیں۔ انہوں نے دونوں ممالک کو "آہنی بھائی” قرار دیتے ہوئے کہا کہ وقت گزرنے کے ساتھ یہ رشتہ مزید مضبوط ہوا ہے اور مستقبل میں دفاعی شراکت مزید گہری ہوگی۔
ملاقات میں ایئر چیف نے چین کی جانب سے دفاعی جدیدکاری، انسانی وسائل کی ترقی، ٹیکنالوجی کی منتقلی اور مشترکہ تحقیق و ترقی کے شعبوں میں تعاون کو سراہا۔ دونوں فریقین نے اعلیٰ سطحی روابط کو باقاعدہ بنانے، مشترکہ مشقوں کے دائرہ کار کو وسعت دینے اور کثیرالملکی فریم ورکز کے تحت مشترکہ ردعمل کو فروغ دینے پر اتفاق کیا۔
چینی سفیر نے حالیہ مشرقی سرحدی کشیدگی کے دوران پاک فضائیہ کی بے مثال پیشہ ورانہ مہارت اور آپریشنل کارکردگی کو سراہا۔ انہوں نے چینی ساختہ دفاعی آلات کے مؤثر استعمال اور قومی سلامتی کے تحفظ میں پاک فضائیہ کے کردار کو خراج تحسین پیش کیا۔ سفیر نے پاکستان کی خود انحصاری کی پالیسی کو سراہتے ہوئے یقین دہانی کرائی کہ چین، فضائی دفاعی صلاحیتوں کے فروغ کے لیے پاکستان کو مکمل تکنیکی معاونت فراہم کرتا رہے گا۔
ملاقات کے اختتام پر دونوں ممالک نے اپنی دیرینہ اسٹریٹیجک شراکت داری کو جدید تقاضوں سے ہم آہنگ کرتے ہوئے تعاون اور اختراعی اشتراک کو مزید فروغ دینے کے عزم کا اعادہ کیا۔
