خلیج اردو
پاکستان کے اسٹار بلے باز بابر اعظم متحدہ عرب امارات کی آئی پی ایل طرز کی ڈی پی ورلڈ انٹرنیشنل لیگ ٹی ٹوئنٹی کے پانچویں ایڈیشن میں ایک ٹیم کی نمائندگی کریں گے۔ لیگ میں بابر اعظم کی شرکت کا اعلان پلیئر آکشن سے قبل جاری کی گئی کھلاڑیوں کی فہرست میں کیا گیا ہے۔
پلیئر آکشن یکم اکتوبر کو دبئی کی آئی سی سی اکیڈمی انڈورز میں ہوگا، جس میں 23 ممالک سے تعلق رکھنے والے 200 سے زائد کھلاڑی شامل ہوں گے۔ فہرست میں بابر اعظم کے علاوہ فل سالٹ، ٹام بینٹن، رحمان اللہ گرباز، وانندو ہسرنگا، الزاری جوزف، فاف ڈو پلیسی اور لیام لیونگ اسٹون سمیت دیگر عالمی شہرت یافتہ ٹی ٹوئنٹی کھلاڑی بھی شامل ہیں۔
بابر اعظم کی شمولیت کو لیگ کیلئے اہم اضافہ قرار دیا جارہا ہے۔ ان کی موجودگی سے نومبر میں شروع ہونے والے پانچویں ایڈیشن کے دوران شائقین کی بڑی تعداد کی اسٹیڈیم آمد متوقع ہے۔
ڈی پی ورلڈ آئی ایل ٹی ٹوئنٹی 2026 کا انعقاد 21 نومبر سے 20 دسمبر تک ہوگا۔ لیگ کے میچز دبئی انٹرنیشنل اسٹیڈیم، شارجہ کرکٹ اسٹیڈیم اور ابوظبی کے زاید کرکٹ اسٹیڈیم میں کھیلے جائیں گے، جبکہ مکمل شیڈول کا اعلان بعد میں کیا جائے گا۔
پلیئر آکشن میں کھلاڑیوں کو 80 ہزار، 40 ہزار اور 10 ہزار ڈالر کی مختلف بنیادی قیمتوں کے زمروں میں رکھا گیا ہے۔ متحدہ عرب امارات، کویت اور سعودی عرب کے تمام کھلاڑی 10 ہزار ڈالر کی بنیادی قیمت سے آکشن میں شامل ہوں گے۔
آکشن کے قواعد کے مطابق اس سیزن میں متحدہ عرب امارات، سعودی عرب یا کویت کے کسی کھلاڑی کو ٹیم میں برقرار رکھنے کی اجازت نہیں ہوگی۔ تاہم ہر فرنچائز کو ایک متحدہ عرب امارات کے کھلاڑی کیلئے رائٹ ٹو میچ کا اختیار حاصل ہوگا، بشرطیکہ وہ کھلاڑی گزشتہ سیزن میں اسی ٹیم کیلئے کھیلا ہو یا حالیہ ڈی پی ورلڈ آئی ایل ٹی ٹوئنٹی ڈویلپمنٹ ٹورنامنٹ میں اس فرنچائز کی نمائندگی کرچکا ہو۔
ہر فرنچائز آکشن میں 1.3 ملین ڈالر کے بجٹ کے ساتھ شریک ہوگی، جبکہ پری آکشن سائننگز کیلئے مختص 700 ہزار ڈالر میں سے بچنے والی رقم بھی فرنچائز کے دستیاب بجٹ میں شامل ہوگی۔
