خلیج اردو
دبئی: وزارتِ انسانی وسائل و اماراتائزیشن (MoHRE) نے انکشاف کیا ہے کہ 2025 کے ابتدائی چھ ماہ کے دوران نجی شعبے میں جعلی اماراتائزیشن کے 405 کیسز ریکارڈ پر آئے ہیں۔ وزارت کے مطابق ان خلاف ورزیوں پر قانونی کارروائی جاری ہے، جس میں جرمانے اور مزید پابندیاں شامل ہو سکتی ہیں۔
جعلی اماراتائزیشن اس وقت سامنے آتی ہے جب کمپنیاں غلط اعداد و شمار کے ذریعے اماراتی ملازمین کی تعداد بڑھا چڑھا کر پیش کرتی ہیں یا صرف کاغذی طور پر اماراتی شہریوں کو تنخواہ پر رکھ کر کوئی حقیقی ذمہ داری نہیں دیتیں۔ یہ عمل حکومت کی اس پالیسی کو نقصان پہنچاتا ہے جس کا مقصد نجی شعبے میں اماراتی شراکت بڑھانا ہے۔
وزارت نے اس بات پر زور دیا ہے کہ وہ قوانین کے نفاذ کے لیے پُرعزم ہے۔ حکام نے شہریوں اور رہائشیوں سے اپیل کی ہے کہ وہ کسی بھی مشکوک کیس کی اطلاع وزارت کے ہاٹ لائن 600590000، اسمارٹ ایپ یا سرکاری ویب سائٹ کے ذریعے دیں۔
