یو اے ای اسکولز میں حاضری کے سخت قوانین نافذ

خلیج اردو
دبئی: وزارتِ تعلیم نے تعلیمی سال 2025-26 کے لیے طلبہ کی حاضری اور غیر حاضری کے نئے سخت قوانین متعارف کرا دیے ہیں تاکہ نگرانی مزید مؤثر ہو اور والدین کی شمولیت بڑھائی جا سکے۔

نئے ضابطے کے مطابق بغیر کسی جواز کے صرف ایک دن غیر حاضر رہنے پر انتباہ جاری کیا جائے گا۔ اگر کوئی طالب علم ایک تعلیمی سال میں 15 دن بغیر عذر کے غیر حاضر رہا تو اس کا تعلیمی ریکارڈ اور سرپرست دونوں کو متعلقہ حکام اور چائلڈ پروٹیکشن اداروں کو بھیج دیا جائے گا۔

وزارت نے فوری اطلاع دینے والا نیا سسٹم بھی متعارف کرایا ہے جس کے تحت والدین کو فوراً مطلع کیا جائے گا جب ان کا بچہ اسکول نہیں پہنچے گا۔

قوانین کے مطابق جمعے کے دن یا سرکاری چھٹی سے پہلے یا بعد غیر حاضر رہنے کو دو دن شمار کیا جائے گا۔ ایک سہ ماہی میں پانچ دن اور سال بھر میں 15 دن سے زائد غیر حاضری کی اجازت نہیں ہوگی، بصورت دیگر طالب علم کو سال دوبارہ دہرانا پڑ سکتا ہے۔

والدین کو یہ حق حاصل ہوگا کہ وہ پانچ ورکنگ ڈیز کے اندر کسی بھی کارروائی کے خلاف اپیل کر سکیں۔