اپوزیشن کا اگلے 48 گھنٹوں میں تحریک عدم اعتماد لانے کا فیصلہ ، مولانا فضل الرحمن کی جانب سے نمبرز پورے ہونے کا دعویٰ

خلیج اردو
اسلام آباد : اسلام آباد میں صحافیوں سے غیر رسمی ملاقات کے دوران مولانا فضل الرحمان نے بڑی خبر دے دی ۔ دعویٰ کیا کہ اُن کے پاس تحریک کی کامیابی کے لیے نمبرز پورے ہیں۔

سربراہ پی ڈی ایم مولانا فضل الرحمان کی اسلام آباد میں صحافیوں سے غیر رسمی ملاقات کی ہے۔ دوران ملاقات گفتگو کرتے ہوئے مولانا نے بتایا کہ اگلے 48 گھنٹوں میں تحریک عدم اعتماد لانے کا فیصلہ ہوا ہے۔ اپوزیشن کی کمیٹی اگلے دو روز میں حتمی سفارشات دے گی۔

مولانا نے بتایا کہ تحریک عدم اعتماد اور اجلاس کی ریکوزیشن دونوں پر غور ہورہا ہے۔ اپوزیشن جماعتیں حکومت کی اتحادیوں پر انحصار نہیں کر رہیں ۔۔ہمارا انحصار انفرادی شخصیات پر ہے۔

مولانا فضل الرحمان کا کہنا تھا کہ تمام اپوزیشن جماعتوں کا موجودہ حکومت کو گرانے پر اتفاق ہے۔۔تاہم حکومت گرانے کے بعد نئی حکومت کے قیام سے متعلق ابھی کوئی بات چیت نہیں ہوئی۔عدم اعتماد سے پہلے کسی داخلی تنازعے میں نہیں پڑنا چاہتے۔ہمارا فوکس ہے کہ خزاں جائے، بہار آئے یا نہ آئے۔

ایک سوال کے جواب میں مولانا نے بتایا کہ اسٹیبلشمنٹ کا ان سے کوئی رابطہ نہیں ہے لیکن ن لیگ اورپیپلزپارٹی سے اسٹیبلشمنٹ کے رابطے کے بارے میں انہیں کوئی علم نہیں ۔

مولانا نے کہا کہ امپائر بظاہر نیوٹرل نظر آ رہے ہیں لیکن ہم نے ایمپائر سے کوئی سپورٹ نہیں لینی۔