خلیج اردو
علی محمد خان نے سوشل میڈیا پر اپنے پیغام میں عمران خان کی صحت اور علاج کے حوالے سے تشویش کا اظہار کیا ہے، جس پر سیاسی حلقوں میں بحث شروع ہو گئی ہے۔
اپنے ٹویٹ میں علی محمد خان نے لکھا کہ “کل رات خواب میں خان صاحب کا دیدار ہوا، انہوں نے مجھ سے کچھ باتیں کیں”، اور صبح آنکھ کھلنے پر انہیں سوشل میڈیا کے ذریعے معلوم ہوا کہ عمران خان کو آنکھ کے علاج کے لیے پمز ہسپتال منتقل کیا گیا۔
انہوں نے سوال اٹھایا کہ اس حوالے سے عمران خان کی بہنوں اور پارٹی قیادت کو آگاہ کیوں نہیں کیا گیا، اور کہا کہ مناسب ہوتا کہ ان کے ذاتی معالجین کی نگرانی میں علاج کیا جاتا۔
علی محمد خان نے اپنے مطالبے کو دہراتے ہوئے کہا کہ عمران خان کو شفاء ہسپتال منتقل کیا جائے، جہاں ان کے ذاتی ڈاکٹرز، فیملی اور پارٹی قیادت کی موجودگی میں علاج ممکن ہو سکے۔
انہوں نے اپنے پیغام میں سابق پاکستانی سائنسدان ڈاکٹر عبدالقدیر خان کا شعر بھی نقل کیا اور عمران خان کے لیے نیک خواہشات کا اظہار کرتے ہوئے دعا کی کہ اللہ انہیں صحت دے اور عوام کے درمیان واپس لائے۔
تجزیہ کاروں کے مطابق اس بیان کے بعد عمران خان کی صحت، علاج اور جیل میں سہولیات کے حوالے سے سیاسی بحث مزید تیز ہونے کا امکان ہے۔
