خلیج اردو
اسلام آباد:پاکستان آرمی کے ریٹائرڈ افسر لیفٹیننٹ کرنل اکبر حسین کو فوجیوں کو بغاوت پر اکسانے کے الزام میں سزا سنا دی گئی۔ مجاز عدالت نے مجرم قرار دیتے ہوئے 14 سال کی سخت قید کی سزا سنائی۔ رینک بھی ضبط کر لیا گیا۔
آئی ایس پی آر کے مطابق اکبر حسین کو پاکستان آرمی ایکٹ 1952 کے تحت فیلڈ جنرل کورٹ مارشل کے ذریعے سزا سنا دی گئی۔ مجاز عدالت نے مناسب عدالتی عمل کے ذریعے اسے مجرم قرار دیتے ہوئے 10 مئی 2024 کو 14 سال کی سخت قید کی سزا سنائی۔ عدالتی سزا کے مطابق افسر کا رینک 26 جولائی 2024 کو ضبط کر لیا گیا ہے۔
اس سے قبل عادل فاروق راجہ اور حیدر رضا مہدی کو بھی پاکستان آرمی ایکٹ 1952 کے تحت فوجی اہلکاروں کو بغاوت پر اکسانے کے الزام میں سزا سنائی گئی تھی۔ دونوں سابق اہلکار جاسوسی سے متعلق آفیشل سیکرٹ ایکٹ 1923 کی دفعات اور ان کی خلاف ورزی اور ریاست کے تحفظ اور مفاد کے لئے منفی کارروائیوں میں ملوث پائے گئے تھے۔
آئی ایس پی آر کا کہنا ہے کہ مجاز عدالت نے 7 اور 9 اکتوبر 2023 کو عادل فاروق راجہ اور حیدر رضا مہدی کو بالترتیب 14 اور 12 سال قید بامشقت اور عہدہ ضبط کرنے کی سزا سنائی تھی۔ یہ سزائیں دونوں افراد پر 21 نومبر 2023 سے نافذ العمل ہیں۔
