وزیرِ اعظم عمران خان نے گلگت بلتستان کو عبوری طور پر صوبہ بنانے کا اعلان کردیا، فیصلہ قوامِ متحدہ کی قرارداد کیمطابق کیا گیا۔

خلیج اردو: پاکستان کے وزیر اعظم عمران خان نے اتوار کے روز گلگت بلتستان کے لئے عبوری صوبائی حیثیت دینے کا اعلان کردیا جو اقوام متحدہ کی سیکیورٹی کونسل کی قراردادوں کو مدنظر رکھ کر کیا گیا ہے۔

عمران خان نے گلگت بلتستان کی یوم آزادی کی تقریب کے موقع پر وہاں کا دورہ کیا اور اپنے خطاب میں کہا کہ میں ایک خوشی کے موقع پر گلگت بلتستان آیا ہوں، جہاں 73 سال قبل گلگت اسکاؤٹس نے اپنی جان کی قربانی دے کر گلگت بلتستان کو آزاد کروایا، مجھے خوشی ہے کہ میں دوسرے سال یہاں خوشی منانے آیا ہوں اور جب تک میں وزیراعظم رہوں گا میری کوشش رہے گی کہ میں یکم نومبر گلگت بلتستان کے عوام کے ساتھ گزاروں۔

اپنی بات کو جاری رکھتے ہوئے ان کا کہنا تھا میں 15 سال کی عمر میں پہلی مرتبہ گلگت آیا، جب قراقرم ہائی وے بن رہی تھی، میں اسکول کی ٹریکنگ ٹیم کے ساتھ آیا، مجھے اس وقت جو ٹریکنگ کا شوق ہوا وہ آج تک ہے کیونکہ اس علاقے میں جو ٹریکنگ ہے وہ دنیا میں کہیں نہیں ہے تاہم وزیراعظم بننے کا یہ نقصان ہوا ہے کہ میں ٹریکنگ نہیں کرسکتا۔

عمران خان کا کہنا تھا کہ آج گلگت اسکاؤٹس اور ان شہدا کو خراج تحسین پیش کرنا تھا جنہوں نے قربانیاں دے کر اس علاقے کو آزاد کروایا، دوسرا مجھے یہاں کے لوگوں کو مبارک باد دینی تھی کہ ہم نے فیصلہ کیا ہے کہ گلگت بلتستان کو عبوری صوبائی حیثیت دینی ہے جو یہاں کے لوگوں کا مطالبہ تھا۔

انہوں نے کہا کہ ہم نے یہ فیصلہ اقوام متحدہ کی سیکیورٹی کونسل کی قراردادوں کو مدنظر رکھتے ہوئے کیا ہے، ساتھ ہی انہوں نے گلگت بلتستان انتخابات قریب ہونے کی وجہ سے علاقے کے لیے ترقیاتی پیکج پر بات کرنے سے گریز کیا۔

وزیراعظم کے مطابق ہماری حکومت کی پالیسی یہ ہے کہ اپنے کمزور طبقے کو اٹھایا جائے، جو لوگ پیچھے رہ گئے ہیں ان کو اوپر اٹھانا اولین ترجیح ہے، ساتھ ہی گلگت بلتستان، قبائلی علاقے اور بلوچستان، پنجاب کے مغربی حصے اور اندرون سندھ پیچھے رہ گیا ہے اور ہماری کوشش ہے کہ ان سب علاقوں کو اوپر اٹھایا جائے، آنے والے دنوں میں آپ دیکھیں گے ہمارا سارا ترقیاتی پروگرام ان علاقوں کی طرف جائے گا۔

یکم نومبر 1947 کو گلگت بلتستان نے آزادی کا اعلان کیا اور پاکستان میں شمولیت اختیار کی تھی۔

Prime Minister @ImranKhanPTI announces provisional provincial status for Gilgit-Baltistan.#APPNews @PakPMO #Gilgit_Baltistan #Gilgit pic.twitter.com/TLwEG1EhBJ

— APP 🇵🇰 (@appcsocialmedia) November 1, 2020

"آج گلگت بلتستان کو عبوری صوبائی حیثیت دینے کا اعلان کرتا ہوں"

وزیراعظم عمران خان کا گلگت بلتستان آزادی پریڈ کی تقریب سے خطاب#PMIKinGilgitBaltistan pic.twitter.com/of1GgoQOlH

— Prime Minister's Office (@PakPMO) November 1, 2020