خلیج اردو
اسلام آباد، 6 مارچ – ترجمان دفتر خارجہ شفقت خان نے ہفتہ وار بریفنگ میں کہا ہے کہ پاکستان نے اقوام متحدہ کی قراردادوں کے تحت شریف اللہ کو گرفتار کیا، تاہم اسے کس قانون کے تحت امریکہ کے حوالے کیا گیا، اس حوالے سے وزارت قانون بہتر وضاحت کر سکتی ہے۔ انہوں نے کہا کہ وزیر اعظم کا شریف اللہ کی گرفتاری پر ردعمل ریاستی مؤقف تھا۔
ترجمان نے مزید بتایا کہ امریکی مشیرِ قومی سلامتی نے وزیر خارجہ اسحاق ڈار کو کال کی، جس میں مختلف امور پر تبادلہ خیال کیا گیا۔ انہوں نے کہا کہ سابق امریکی صدر ڈونلڈ ٹرمپ نے بھی پاکستان کی انسدادِ دہشت گردی کی کوششوں کو سراہا تھا۔ بریفنگ میں یہ بھی بتایا گیا کہ پاکستان اور امریکہ کے درمیان تجارت، سرمایہ کاری، ماحولیاتی تبدیلی، صحت اور انسدادِ دہشت گردی سمیت مختلف شعبوں میں تعاون جاری رکھنے پر اتفاق کیا گیا ہے۔
شفقت خان نے اسرائیل کی جانب سے غزہ میں امداد کے داخلے پر عائد پابندی کی شدید مذمت کی اور عالمی برادری سے اس معاملے پر فوری اقدامات کا مطالبہ کیا۔ انہوں نے بھارتی وزیر خارجہ کے مقبوضہ کشمیر سے متعلق بیان کو مسترد کرتے ہوئے کہا کہ کشمیری عوام کے دیرینہ مسائل کو محض اقتصادی بحالی سے حل نہیں کیا جا سکتا۔ ترجمان نے بھارتی وزیر مملکت کے آزاد کشمیر واپس لینے کے بیان کو بھی افسوسناک قرار دیتے ہوئے کہا کہ ایسے اشتعال انگیز بیانات خطے کے امن کے لیے خطرناک ثابت ہو سکتے ہیں۔
