شارجہ پولیس نے ویڈیو جاری کردی: کار کی ٹکر سے شہری جاں بحق، عوام کو محفوظ انداز میں سڑک پار کرنے کی ہدایت

خلیج اردو
شارجہ پولیس نے ایک ویڈیو جاری کی ہے جس میں دیکھا جا سکتا ہے کہ ایک شخص پیدل گزرگاہ (پیدسٹرین کراسنگ) سے سڑک پار کرنے کی کوشش کرتا ہے، لیکن سگنل اس وقت گاڑیوں کے لیے سبز ہوتا ہے۔ نتیجتاً وہ کار کی زد میں آکر جان کی بازی ہار جاتا ہے۔

حکام نے بتایا کہ اگرچہ شہری مخصوص جگہ سے سڑک پار کر رہا تھا، لیکن سگنل کی خلاف ورزی نے یہ حادثہ جنم دیا۔ پولیس کے مطابق تقریباً ہر رپورٹ اسی ایک وجہ سے شروع ہوتی ہے: "غیر محفوظ طریقے سے سڑک پار کرنا”۔

حکام کی وارننگ

پولیس نے شہریوں کو یاد دلایا کہ چند سیکنڈ بچانے کے لیے لاپرواہی سے سڑک پار کرنے کی کوشش نہ صرف اپنی جان کو خطرے میں ڈالتی ہے بلکہ دوسروں کی زندگیوں پر بھی اثر انداز ہو سکتی ہے۔ ایسے حادثات صرف متاثرہ شخص ہی نہیں بلکہ اس کے اہل خانہ کو بھی شدید صدمے سے دوچار کرتے ہیں۔

نیا ٹریفک قانون اور جرمانے

یو اے ای میں 29 مارچ سے نافذ نئے ٹریفک قوانین کے تحت جے واکنگ (غلط یا غیر مجاز مقام سے سڑک پار کرنا) پر سخت سزائیں مقرر کی گئی ہیں۔

• پہلے جے واکنگ پر جرمانہ 400 درہم تھا۔

• اب اگر اس حرکت سے حادثہ پیش آئے تو 5,000 سے 10,000 درہم جرمانہ اور قید کی سزا ہوسکتی ہے۔

• 80 کلومیٹر فی گھنٹہ یا اس سے زیادہ اسپیڈ لمٹ والی سڑک پر غیر مجاز مقام سے پار کرنے والے کو کم از کم تین ماہ قید یا 10,000 درہم سے زائد جرمانے کا سامنا کرنا پڑے گا۔