خلیج اردو
دبئی — دبئی پولیس نے اتوار کے روز اعلان کیا ہے کہ ایک 8 سالہ بچی نے ایمانداری کی اعلیٰ مثال قائم کرتے ہوئے سنیما ہال میں ملنے والی 17 ہزار درہم کی رقم فوری طور پر پولیس کے حوالے کر دی۔
مصری نژاد بچی لیلیٰ جمال رمضان اپنے والدین کے ساتھ ایک مال کے سنیما میں فلم دیکھنے آئی تھی۔ جب وہ ٹکٹ کے انتظار میں بینچ پر بیٹھی تھی تو اسے رقم ملی، جس کی بابت اس نے فوراً اپنے والدین کو مطلع کیا۔
اس کے والد، جو رقم کی مقدار دیکھ کر حیران رہ گئے، فوری طور پر اہلِ خانہ کے ہمراہ الراشدیہ پولیس اسٹیشن پہنچے اور نقدی پولیس کے حوالے کر دی۔ اتفاق سے، اسی وقت رقم کا اصل مالک گمشدگی کی رپورٹ درج کروانے کے لیے تھانے پہنچ چکا تھا، اور مکمل رقم واپس ملنے پر حیرت اور خوشی کا اظہار کیا۔
دبئی پولیس کے اسسٹنٹ کمانڈر برائے تفتیشی امور، میجر جنرل خلیل ابراہیم المنصوری نے بچی کو اس کے ایماندارانہ اقدام پر اعزاز سے نوازا۔
منصوری نے لیلیٰ کے عمل کو سراہتے ہوئے کہا کہ بچوں میں ایمانداری جیسے اقدار کو فروغ دینا نہ صرف ان کی تربیت کا حصہ ہے بلکہ اس سے پورے معاشرے کو فائدہ پہنچتا ہے۔
انہوں نے مزید کہا کہ بچی کو اس کے خاندان کے سامنے اعزاز دینا ایک مثبت مثال قائم کرے گا اور دوسروں کو بھی اسی طرح کے رویے اپنانے کی ترغیب دے گا۔
یہ پہلا موقع نہیں جب دبئی پولیس نے عوامی ایمانداری پر کسی شہری کو سراہا ہو۔ 18 اپریل کو ایک شہری کو پاسپورٹ اور رقم واپس کرنے پر اعزاز دیا گیا، جبکہ 5 اپریل کو دو شہریوں کو زیورات اور نقدی واپس کرنے پر نائف پولیس اسٹیشن میں اعزاز دیا گیا تھا۔
اسی طرح ایک سیاح کو بھی سونے کا زیور واپس کرنے پر سراہا گیا، اور 2024 کے دوران پولیس نے کئی شہریوں کو ان کے مثبت اور اخلاقی رویوں پر اعزازات سے نوازا، جن میں ایک بھارتی شہری بھی شامل تھا جس نے ایک لاکھ درہم کی رقم پولیس کو واپس کی۔
