جی سیون اجلاس میں ٹرمپ کی اماراتی صدر کی تعریف، شیخ محمد بن زاید کو باوقار رہنما اور حقیقی جنگجو قرار دے دیا

خلیج اردو
فرانس میں ہونے والے جی سیون اجلاس کے موقع پر امریکی صدر ڈونلڈ ٹرمپ نے متحدہ عرب امارات کے صدر شیخ محمد بن زید النہیان  کو "جنگجو” اور انتہائی باوقار شخصیت قرار دیتے ہوئے ان کی قیادت کو خراجِ تحسین پیش کیا ہے۔

دو طرفہ ملاقات کے دوران ڈونلڈ ٹرمپ نے کہا کہ شیخ محمد بن زاید وہ رہنما ہیں "جو ضروری کام انجام دیتے ہیں اور اسی وجہ سے دنیا بھر میں ان کا احترام کیا جاتا ہے۔” انہوں نے مزید کہا کہ ہر شخص شیخ محمد بن زاید اور ان کے ملک کا احترام کرتا ہے۔

امریکی صدر نے دونوں ممالک کے درمیان دیرینہ تعلقات کا ذکر کرتے ہوئے کہا کہ متحدہ عرب امارات نے امریکا میں کھربوں ڈالر کی سرمایہ کاری کی ہے۔ ان کے مطابق یہ سرمایہ کاری ایسے منصوبوں پر خرچ ہو رہی ہے جو ماضی میں کبھی نہیں ہوئے، جبکہ امریکا اور امارات کے تعلقات غیر معمولی حد تک مضبوط اور مثالی ہیں۔

اس موقع پر شیخ محمد بن زاید نے امریکی صدر کا شکریہ ادا کرتے ہوئے کہا کہ امریکا کی جانب سے دوست ممالک اور اتحادیوں کی حمایت قابلِ قدر ہے۔ انہوں نے ایران جنگ کے دوران امریکی تعاون پر خصوصی شکریہ بھی ادا کیا اور کہا کہ یہ حمایت امارات کے لیے بہت اہمیت رکھتی ہے۔

ابراہیم معاہدوں سے متعلق ایک سوال کے جواب میں ٹرمپ نے کہا کہ شیخ محمد بن زاید اس معاملے میں بہت آگے تھے کیونکہ انہوں نے ابتدائی مرحلے میں ہی ان معاہدوں میں شمولیت اختیار کر لی تھی۔ ان کا کہنا تھا کہ مستقبل میں مزید ممالک بھی ان معاہدوں کا حصہ بنیں گے۔

اجلاس کے موقع پر امریکی صدر نے امریکا اور ایران کے درمیان طے پانے والی مفاہمتی یادداشت پر بھی گفتگو کی۔ انہوں نے دعویٰ کیا کہ معاہدے کے بعد تیل کی ترسیل معمول پر آ رہی ہے، قیمتوں میں کمی واقع ہو رہی ہے اور امریکی مالیاتی منڈیاں تیزی سے ترقی کر رہی ہیں۔

ٹرمپ نے زور دے کر کہا کہ معاہدے کا سب سے اہم نکتہ یہ ہے کہ ایران جوہری ہتھیار حاصل نہیں کرے گا۔ انہوں نے یہ بھی کہا کہ آبنائے ہرمز ساٹھ روز بعد ٹول فری رہے گی اور وہ جلد ایک پریس کانفرنس میں مفاہمتی یادداشت کی تفصیلات پیش کریں گے۔

دوسری جانب ایرانی نائب وزیر خارجہ Kazem Gharibabadi نے کہا کہ تہران نے اس مفاہمتی یادداشت سے صرف اس وقت اتفاق کیا جب اس کے تمام حتمی مطالبات کو دستاویز میں شامل کر لیا گیا۔ ان کے مطابق آئندہ مذاکرات میں جوہری پروگرام، پابندیوں کے خاتمے، ایران کی تعمیرِ نو اور معاہدے پر عملدرآمد کی نگرانی کے طریقہ کار پر بھی بات چیت ہوگی۔

یہ ملاقات اور بیانات مشرقِ وسطیٰ میں سفارتی سرگرمیوں اور امریکا، امارات اور ایران کے درمیان بدلتی ہوئی علاقائی صورتحال کی اہم عکاسی کرتے ہیں۔