خلیج اردو
ابوظہبی نے بھارتی سیاحوں کے لیے 30 روزہ یو اے ای ٹورسٹ ویزا مفت فراہم کرنے کی پائلٹ اسکیم شروع کردی ہے۔ اس اسکیم کے تحت اہل بھارتی پاسپورٹ رکھنے والے افراد کو ابوظہبی میں کم از کم 3 راتوں کی تعطیلاتی بکنگ پر تقریباً 285 درہم مالیت کا ویزا مفت دیا جائے گا۔
یہ پائلٹ پروگرام ابوظہبی کے محکمہ ثقافت و سیاحت نے شروع کیا ہے اور یکم اگست سے 31 اکتوبر 2026 تک سفر کرنے والے سیاح اس سے فائدہ اٹھا سکتے ہیں۔ ابتدائی طور پر اس پروگرام کے تحت 20 ہزار تک ویزے جاری کیے جائیں گے۔
مفت ویزا دینے والی 11 ٹریول ایجنسیاں
- ہالی ڈے ٹرائب
- تھامس کک اور ایس او ٹی سی
- تھرلّوفیلیا
- اکبر ہالیڈیز
- یوٹازو ڈاٹ کام
- کیسری ٹورز
- ریا ٹریولز
- رائل ٹورز
- پک یور ٹریل
- میک مائی ٹرپ
- آریان لیزر
سیاحوں کو مفت ویزے کے لیے انہی میں سے کسی شریک ٹریول پارٹنر کے ذریعے اہل ابوظہبی ہالیڈے پیکیج بک کرنا ہوگا۔
اس اسکیم میں تمام بھارتی پاسپورٹ رکھنے والے افراد شامل ہوسکتے ہیں، تاہم کم از کم تین راتوں کا قیام اور دیگر پروگرام شرائط پوری کرنا ضروری ہے۔
اہم بات یہ ہے کہ سفر 31 اکتوبر 2026 تک مکمل ہونا ضروری ہے۔ اگر کوئی شخص 31 اکتوبر سے پہلے پیکیج بک کرلے لیکن سفر اس تاریخ کے بعد کرے تو وہ مفت ویزا اسکیم کا اہل نہیں ہوگا۔
خاندان کے لیے مفت ویزوں کی تعداد پر کوئی الگ حد مقرر نہیں کی گئی، تاہم ہر مسافر کو پروگرام کی شرائط پوری کرنا ہوں گی۔ مجموعی طور پر پائلٹ پروگرام میں 20 ہزار ویزوں کی حد مقرر ہے۔
تاہم صرف ہالیڈے پیکیج بک کرنے سے ویزا ملنا یقینی نہیں ہوگا۔ تمام ویزا درخواستیں یو اے ای کے امیگریشن قوانین اور متعلقہ حکام کی منظوری سے مشروط ہوں گی۔
ویزا کی پروسیسنگ بھی معمول کے مطابق ہوگی اور اس اسکیم کے تحت فوری یا خصوصی پروسیسنگ کی کوئی الگ مدت مقرر نہیں کی گئی۔
اسکیم کے مستقبل کا فیصلہ اکتوبر 2026 کے بعد اس کے نتائج اور اثرات کا جائزہ لینے کے بعد کیا جائے گا۔
