خلیج اردو
ابوظہبی حکومت نے خلیفہ سٹی میں ای20 شاہراہ کی بڑے پیمانے پر توسیع کا منصوبہ شروع کرنے کا اعلان کیا ہے، جس کا مقصد ٹریفک کے بہاؤ کو بہتر بنانا، رش میں کمی لانا اور زاید انٹرنیشنل ایئرپورٹ تک رسائی کو مزید آسان بنانا ہے۔
منصوبے کے تحت E20 شاہراہ کو موجودہ 3 لین سے بڑھا کر 5 لین تک توسیع دی جائے گی، جس سے سڑک کی گنجائش میں نمایاں اضافہ ہوگا اور روزانہ سفر کرنے والے ہزاروں افراد کو سہولت ملے گی۔
منصوبے میں 10.5 کلومیٹر طویل اضافی ریمپس اور لوپس کی تعمیر کے ساتھ 4 نئے پل بھی شامل ہیں، جن کا مقصد ٹریفک کی روانی بہتر بنانا اور مختلف مقامات پر پیدا ہونے والی رکاوٹوں کو کم کرنا ہے۔
خلیفہ سٹی اور زاید انٹرنیشنل ایئرپورٹ کے اطراف رابطہ مزید مضبوط بنانے کے لیے 1.5 کلومیٹر اندرونی سڑکیں تعمیر کی جائیں گی، جبکہ 8 ٹریفک سگنل جنکشنز کو بھی منصوبے کا حصہ بنایا گیا ہے۔
منصوبے میں شہری خوبصورتی اور ماحول دوست ترقی کو مدنظر رکھتے ہوئے گرین اسپیسز اور لینڈ اسکیپنگ کو بھی شامل کیا گیا ہے۔
اس کے علاوہ 62 کلومیٹر طویل بارشی پانی کی نکاسی کا نظام، 37 کلومیٹر آبپاشی نیٹ ورک اور 485 نئی اسٹریٹ لائٹس نصب کی جائیں گی۔
یہ منصوبہ ابوظہبی کی جدید ٹرانسپورٹ انفراسٹرکچر کی حکمت عملی کا حصہ ہے، جس کا مقصد بڑھتی ہوئی آبادی کی ضروریات پوری کرنا، سڑکوں کو مزید محفوظ بنانا اور شہریوں کے سفری تجربے کو بہتر بنانا ہے۔
