خلیج اردو
ابوظہبی میں 2.85 ارب درہم کی لاگت سے تعمیر ہونے والے مڈ آئی لینڈ پارک وے میگا منصوبے کے پہلے مرحلے کی تکمیل 2027 میں متوقع ہے، منصوبہ مکمل ہونے کے بعد سعدیات آئی لینڈ اور ریم آئی لینڈ کے درمیان سفر کا دورانیہ 25 منٹ سے کم ہوکر صرف 10 منٹ رہ جائے گا۔
محکمہ بلدیات و ٹرانسپورٹ کے مطابق منصوبے کے پہلے مرحلے میں ای بارہ ہائی وے پر سعدیات آئی لینڈ کے شمالی انٹرچینج سے جزیرے کے جنوبی سرے تک اور وہاں سے ام یفینہ آئی لینڈ کے مرکزی انٹرچینج تک 8 لین پر مشتمل ڈوئل کیریج وے تعمیر کی جارہی ہے۔
ڈی ایم ٹی کے ڈائریکٹر جنرل انفراسٹرکچر ڈیولپمنٹ عیسیٰ مبارک المزروعی نے کہا کہ مڈ آئی لینڈ پارک وے منصوبہ ابوظہبی میں جدید انفراسٹرکچر کی تعمیر کی عکاسی کرتا ہے، جہاں ہر بڑے منصوبے کی منصوبہ بندی اور تعمیر کے دوران شہریوں کے معیار زندگی، ماحولیات اور سیاحت، تجارت و لاجسٹکس جیسے اہم اقتصادی شعبوں پر اس کے اثرات کو مدنظر رکھا جاتا ہے۔
منصوبے کے پہلے مرحلے میں تقریباً 2 کلومیٹر کا راستہ سمندر سے حاصل کی گئی زمین پر تعمیر کیا جارہا ہے، جسے کٹاؤ سے محفوظ رکھنے کے لیے ایک لاکھ 50 ہزار مربع میٹر حفاظتی پتھر استعمال کیے گئے ہیں۔ اس کے بعد راستہ تقریباً ڈیڑھ کلومیٹر طویل زیرزمین چینلز سے گزرتا ہے، جس میں خور لفان کے نیچے 600 میٹر طویل اور 11 میٹر گہرا زیر آب حصہ بھی شامل ہے۔
منصوبے کی تعمیر تیز کرنے کے لیے انجینئرز نے کنکریٹ کی چھتوں کے پہلے سے تیار شدہ پینلز استعمال کیے ہیں، جنہیں تعمیراتی مقام سے باہر تیار کرکے موقع پر نصب کیا گیا، جس سے سائٹ پر تعمیراتی کام کا دورانیہ کم کرنے میں مدد ملی۔
مڈ آئی لینڈ پارک وے کے پہلے مرحلے میں 4 کلومیٹر طویل پیدل چلنے اور سائیکلنگ ٹریکس بھی تعمیر کیے جارہے ہیں، جو سعدیات آئی لینڈ پر پہلے سے موجود راستے کو توسیع دے کر ام یفینہ آئی لینڈ تک 12 کلومیٹر طویل مسلسل فعال سفری راستے میں تبدیل کردیں گے۔
منصوبے میں ماحول دوست اقدامات بھی شامل ہیں، جن کے تحت 23 ہزار میٹر طویل اسمارٹ اور توانائی کی بچت کرنے والی لائٹس نصب کی جائیں گی، جبکہ مقامی اور ری سائیکل شدہ تعمیراتی مواد استعمال کیا جائے گا۔ مقامی اور کم پانی کی ضرورت رکھنے والے پودوں کے لیے 14 ہزار میٹر طویل آبپاشی کا نظام بھی قائم کیا جارہا ہے۔
منصوبے کے دوسرے مرحلے میں اس کوریڈور کو مزید 14.5 کلومیٹر تک توسیع دی جائے گی، جو بل رمیض اور سمالیہ آئی لینڈز سے گزرتے ہوئے ساس النخل، الراحة بیچ اور خلیفہ سٹی تک پہنچے گا۔ اس مرحلے میں دونوں سمتوں میں 4،4 لین ہوں گی اور مڈ آئی لینڈ کے مختلف علاقوں کے درمیان سفر کا دورانیہ تقریباً 7 منٹ تک محدود کرنے کا ہدف رکھا گیا ہے۔
دوسرے مرحلے میں سمندری پل، بلند فلائی اوورز اور زیر آب سڑک کا ٹنل بھی تعمیر کیا جائے گا، جس کی منصوبہ بندی اردگرد موجود مینگرووز، نمکین دلدلی علاقوں اور ساحلی ماحولیاتی نظام کو محفوظ رکھنے کے لیے کی گئی ہے۔
ڈی ایم ٹی نے 37 کلومیٹر طویل ایکسپریس وے کی منصوبہ بندی کا بھی اعلان کیا ہے، جو الحدیرات آئی لینڈ کو النوف کے مقام پر ای گیارہ ہائی وے سے منسلک کرے گا۔ یہ راستہ الفطیسی اور الاریام سمیت مختلف قدرتی جزائر سے گزرتے ہوئے الظفرہ کو براہ راست ابوظہبی آئی لینڈ سے جوڑے گا۔
مجوزہ ساحلی ایکسپریس وے پر تجارتی مال بردار ٹریفک کے ساتھ عام شہریوں کی آمدورفت بھی ممکن ہوگی، جبکہ بل صیایف میرین پروٹیکٹڈ ایریا اور رامسر ویٹ لینڈ کے تحفظ کے لیے خصوصی ماحولیاتی اقدامات شامل کیے جائیں گے۔
مکمل نیٹ ورک فعال ہونے کے بعد ابوظہبی کے دور دراز علاقوں کو آپس میں جوڑنے والا یہ وسیع ٹرانسپورٹ نظام سعدیات آئی لینڈ سے زاید سٹی تک سفر کا وقت 15 منٹ سے بھی کم کرنے میں مدد دے گا۔
