خلیج اردو
سیئول: دنیا بھر میں کروڑوں مداحوں کے دل جیتنے والے بی ٹی ایس کے لیڈر اور شاعر کم نامجون المعروف آر ایم نے اپنی زندگی کی 31ویں بہار دیکھ لی۔ آر ایم کو نہ صرف بطور ریپر اور فنکار سراہا جاتا ہے بلکہ ان کی تحریریں اور خطوط مداحوں کے لیے امید اور خود سے محبت کا پیغام بھی رکھتے ہیں۔
ان کے خط اور الفاظ کو مداحوں نے ہمیشہ گہری معنویت اور جذبات سے بھرا ہوا پایا۔ یہی وجہ ہے کہ دنیا بھر کے فینز کوریائی زبان سیکھنے کی خواہش رکھتے ہیں تاکہ وہ آر ایم کے الفاظ کو براہِ راست محسوس کر سکیں۔ کوریائی ناقدین بھی اس بات کا اعتراف کرتے ہیں کہ ان کے جملوں کے ترجمے میں اکثر اصل شاعری اور احساسات کھو جانے کا خدشہ رہتا ہے۔
آر ایم کی شخصیت کئی جہتوں پر مشتمل ہے — وہ ایک جاندار ریپر ہیں، گہرے سوچنے والے فنکار ہیں، میوزیمز میں گھنٹوں غائب رہنے والے تخلیق کار ہیں، گروپ کے وہ قائد ہیں جنہوں نے بی ٹی ایس کو عالمی سطح پر کامیابی کے راستے پر ڈالا، اور ایک عام انسان بھی ہیں جو کبھی کبھار سمندر کنارے جا کر کیکڑے پکڑنے کی خواہش رکھتے ہیں۔
