دبئی: عدالت نے شواہد کی عدم موجودگی پر دو افراد کو اغوا اور زیادتی کے الزامات سے بری کر دیا

خلیج اردو
دبئی: دبئی کریمنل کورٹ نے دو اماراتی شہریوں کو اغوا، زیادتی اور زبردستی جنسی حملے جیسے سنگین الزامات سے شواہد کی ناکافی بنیاد پر بری کر دیا۔ عدالت نے گواہوں کے بیانات، میڈیکل رپورٹس اور مکمل کیس فائل کا جائزہ لینے کے بعد قرار دیا کہ الزامات ثابت کرنے کے لیے کوئی قطعی ثبوت موجود نہیں ہے۔

پہلے ملزم، جو بے روزگار ہیں، پر خاتون کو اغوا کرنے، حراست میں رکھنے، زیادتی کی نیت سے جان سے مارنے کی دھمکیاں دینے، زبردستی زیادتی کرنے اور جسمانی تشدد کا الزام تھا۔ دوسرے ملزم، جو ایک انتظامی ملازم ہیں، پر اغوا میں مدد، زبردستی جنسی حملے اور جسمانی تشدد کے الزامات عائد کیے گئے تھے۔

متاثرہ خاتون نے عدالت میں بیان دیا کہ ملزم نے انہیں کھانے کی دعوت دی اور ملاقات کے بعد انہیں ایک نجی فارم ہاؤس لے جایا گیا جہاں اسے مبینہ طور پر مارا پیٹا گیا، دھمکیاں دی گئیں اور زیادتی کا نشانہ بنایا گیا۔ خاتون نے دعویٰ کیا کہ دوسرے ملزم نے بھی حملے میں حصہ لیا۔

عدالتی سماعت میں میڈیکل رپورٹس پیش کی گئیں جن میں کچھ چوٹوں کی نشاندہی کی گئی جو 20 دن میں بھر سکتی تھیں، تاہم کوئی ایسا واضح ثبوت نہ ملا جو زبردستی جنسی تعلق کو ثابت کر سکے۔

ملزمان کے وکیل محمد عوامی المنصوری نے دلائل دیے کہ خاتون کا تعلق ملزم سے پہلے سے تھا اور دونوں کے درمیان رضا مندی سے تعلقات قائم تھے۔ انہوں نے مؤقف اپنایا کہ متاثرہ خاتون خود گاڑی میں سوار ہو کر فارم ہاؤس گئیں اور کسی قسم کے جبر یا روک ٹوک کا کوئی مادی ثبوت موجود نہیں۔

وکیل نے مزید کہا کہ اگرچہ متاثرہ خاتون نے زیادتی کا الزام لگایا، لیکن میڈیکل رپورٹ میں وہ جسمانی نشان موجود نہیں تھے جو زبردستی کے دعوے کی تصدیق کرتے۔ نیز، متحدہ عرب امارات کے قانون کے تحت بالغ افراد کے مابین باہمی رضامندی سے قائم جنسی تعلق جرم نہیں ہے۔

عدالت نے قرار دیا کہ خاتون ملزم کے ساتھ رضامندی سے گئی تھیں، اور کوئی ایسا ثبوت پیش نہیں کیا گیا جس سے یہ ثابت ہو کہ انہیں روکا گیا یا باہر نکلنے سے منع کیا گیا۔ عدالت نے یہ بھی کہا کہ ثبوتوں میں شبہ موجود ہے اور یقین کی وہ سطح حاصل نہیں ہو سکی جو سزا کے لیے درکار ہوتی ہے۔

لہٰذا، عدالت نے دونوں ملزمان کو تمام الزامات سے بری کر دیا، اور ساتھ ہی مدعی خاتون کے خلاف ملزمان کی جانب سے دائر کی گئی ہتک عزت کی درخواست بھی مسترد کر دی، یہ کہتے ہوئے کہ خاتون کو قانونی طور پر شکایت درج کرانے کا حق حاصل ہے جب تک کہ بدنیتی ثابت نہ ہو۔