اتحاد ریل مسافر ٹرین سروس کا آغاز، سیور، ویلیو اور فلیکس ٹکٹوں کی تفصیلات جاری

خلیج اردو
متحدہ عرب امارات میں اتحاد ریل کی پہلی مسافر ٹرین سروس 30 جون سے ابوظہبی اور فجیرہ کے درمیان شروع ہو رہی ہے، جس کے لیے مختلف کرایہ جاتی آپشنز متعارف کرا دیے گئے ہیں تاکہ مسافر اپنی ضرورت کے مطابق ٹکٹ منتخب کر سکیں۔

ابتدائی مرحلے میں کمفرٹ کلاس کا کرایہ 55 درہم جبکہ پریمیم کلاس کا کرایہ 120 درہم سے شروع ہوگا۔ دو سال سے کم عمر بچوں کے لیے سفر مفت ہوگا، جبکہ 2 سے 17 سال کے بچوں اور 60 سال سے زائد عمر کے افراد کو رعایتی نرخ فراہم کیے جائیں گے۔

اتحاد ریل نے مسافروں کے لیے تین اقسام کے ٹکٹ متعارف کرائے ہیں۔ "سیور” سب سے کم قیمت ٹکٹ ہے، جس میں نشست خودکار طور پر مختص کی جائے گی، ٹکٹ میں تبدیلی کی اجازت نہیں ہوگی اور رقم واپس نہیں کی جائے گی۔

"ویلیو” ٹکٹ میں مسافر اپنی نشست خود منتخب کر سکیں گے اور سفر کی تاریخ یا وقت میں تبدیلی بھی ممکن ہوگی، تاہم یہ ٹکٹ بھی ناقابلِ واپسی ہوگا۔ اس آپشن کی قیمت سیور ٹکٹ کے مقابلے میں تقریباً 10 درہم زیادہ رکھی گئی ہے۔

"فلیکس” سب سے زیادہ سہولت والا ٹکٹ ہے، جس میں نشست کا انتخاب، ٹکٹ میں تبدیلی اور مکمل رقم کی واپسی کی سہولت شامل ہے۔ اس ٹکٹ کی قیمت سیور کے مقابلے میں تقریباً 20 درہم زیادہ ہوگی۔

مسافر اپنے سفر سے چار ہفتے پہلے تک ٹکٹ بک کرا سکیں گے۔ ابوظہبی اور فجیرہ روٹ کے لیے ٹکٹوں کی فروخت اتحاد ریل کی ایپ اور مخصوص ویب سائٹ پر شروع ہو چکی ہے۔

کمفرٹ کلاس میں آرام دہ نشستیں، وائی فائی، ہر نشست پر بجلی کی سہولت اور سامان رکھنے کے لیے مناسب جگہ فراہم کی جائے گی، جبکہ پریمیم کلاس میں زیادہ کشادہ نشستوں کے ساتھ مفت مشروبات بھی دیے جائیں گے۔

اتحاد ریل کے مطابق ستمبر 2026 سے نیٹ ورک کو دبئی اور الذید تک توسیع دی جائے گی، جبکہ دسمبر میں الظفرہ اور مارچ 2027 میں شارجہ تک مسافر سروس شروع کرنے کا منصوبہ ہے۔

ماہرین کے مطابق اتحاد ریل کی مسافر سروس امارات میں سڑکوں پر ٹریفک کا دباؤ کم کرنے، شہروں کے درمیان سفر کو تیز تر بنانے اور عوام کو ایک سستا اور آرام دہ سفری متبادل فراہم کرنے میں اہم کردار ادا کرے گی۔