خلیج اردو
دبئی میونسپلٹی نے عیدالاضحیٰ تعطیلات کے موقع پر شہر بھر میں خصوصی انتظامات مکمل کر لیے ہیں۔ حکام کے مطابق خوراک کے معیار، عوامی صحت، ساحلوں، پارکس، مارکیٹس اور تفریحی مقامات پر نگرانی سخت کر دی گئی ہے تاکہ شہریوں اور سیاحوں کو محفوظ اور خوشگوار ماحول فراہم کیا جا سکے۔
حکام کا کہنا ہے کہ عید کے دوران شاپنگ سینٹرز، ریسٹورنٹس، عوامی ساحلوں اور تفریحی مقامات پر رش بڑھنے کی توقع ہے، اسی لیے خصوصی انسپیکشن ٹیمیں تعینات کی گئی ہیں۔ خوراک کی تیاری، اسٹوریج، درجہ حرارت اور ترسیل کے تمام مراحل کی نگرانی کی جا رہی ہے تاکہ کسی بھی قسم کی آلودگی یا حفظانِ صحت کی خلاف ورزی سے بچا جا سکے۔
واٹر فرنٹ مارکیٹ اور پھل و سبزی منڈی سمیت قصائی شاپس، چاکلیٹ اور روسٹری مراکز پر بھی نگرانی سخت کر دی گئی ہے۔ دبئی میونسپلٹی کے مطابق سال 2026 کی پہلی سہ ماہی میں تقریباً 81 ہزار خوراکی شپمنٹس کا معائنہ کیا گیا جن میں 27 لاکھ ٹن درآمدی خوراک شامل تھی۔
عیدالاضحیٰ کے باعث گوشت کی طلب میں اضافے کو دیکھتے ہوئے گوشت اور گوشت سے بنی مصنوعات کی خصوصی جانچ کی جا رہی ہے۔ حکام کے مطابق حلال سرٹیفکیٹس اور کولڈ چین سسٹم کی سخت نگرانی کی جا رہی ہے تاکہ خوراک محفوظ حالت میں صارفین تک پہنچ سکے۔
عوامی صحت کے شعبے میں ہوٹلوں، سیلونز، حجام کی دکانوں اور شیشہ کیفیز پر بھی خصوصی مانیٹرنگ جاری ہے۔ خواتین کے سیلونز میں استعمال ہونے والی مہندی کی مصنوعات کی لیبارٹری ٹیسٹنگ بھی کی جا رہی ہے تاکہ نقصان دہ کیمیکلز کی روک تھام ممکن ہو سکے۔
محیصنہ، القوز اور دیگر مزدور رہائشی علاقوں میں صفائی اور فلاحی اقدامات بڑھا دیے گئے ہیں جہاں تعطیلات کے دوران روزانہ تقریباً 30 ہزار افراد کی آمد متوقع ہے۔
عید کی خوشیوں کیلئے دبئی کے مختلف پارکس اور تفریحی مقامات پر خصوصی سرگرمیوں کا بھی اہتمام کیا گیا ہے۔ قرآنی پارک، زعبیل پارک، الممزر پارک اور دیگر پارکس رات 12 بجے تک کھلے رہیں گے جبکہ دبئی فریم میں شام کے اوقات میں لائیو میوزک پرفارمنسز منعقد ہوں گی۔
دبئی کے متعدد ساحلوں کو عید کے دوران صرف فیملیز کیلئے مخصوص کر دیا گیا ہے جن میں جمیرا بیچ اور ام سقیم بیچ شامل ہیں۔ حکام کے مطابق اس اقدام کا مقصد خاندانوں کو محفوظ اور پرسکون تفریحی ماحول فراہم کرنا ہے۔
عید کے پہلے دو دن مختلف پارکس میں مفت آئس کریم تقسیم کی جائے گی جبکہ حتا مارکیٹ میں روایتی الحربية بینڈ کی خصوصی پرفارمنس بھی پیش کی جائے گی۔ بچوں کیلئے چلڈرنز سٹی میں تھیٹر شوز، ورکشاپس اور انٹرایکٹو سرگرمیوں کا اہتمام کیا گیا ہے۔
