فجیرہ میں اتحاد ریل کے پہلے مسافر اسٹیشن کی جھلک، پہاڑوں اور سمندر کے دلکش مناظر توجہ کا مرکز

خلیج اردو
متحدہ عرب امارات کے امارت فجیرہ میں اتحاد ریل کے پہلے مکمل مسافر اسٹیشن کی اندرونی جھلک سامنے آ گئی ہے، جہاں جدید طرزِ تعمیر، آرام دہ سہولیات اور حجر پہاڑوں کے حسین مناظر نے اس منصوبے کو خطے کے اہم ترین ٹرانسپورٹ منصوبوں میں شامل کر دیا ہے۔

اسٹیشن کے داخلی حصے کو کھلے اور کشادہ انداز میں ڈیزائن کیا گیا ہے تاکہ مسافروں کو آمد کے ساتھ ہی خوشگوار ماحول محسوس ہو۔ کریم اور سرمئی رنگوں کے امتزاج کے ساتھ سرخ رنگ کی جھلکیاں پورے اسٹیشن میں نمایاں ہیں۔ داخلی دروازے کے قریب خودکار بیریئرز، معلوماتی ڈیسک اور بڑے ڈیجیٹل اسکرینز نصب کیے گئے ہیں جہاں ٹرین کے اوقات، منزل اور پلیٹ فارم کی تفصیلات دیکھی جا سکیں گی۔

اسٹیشن میں ٹکٹ وینڈنگ مشینیں بھی نصب کی گئی ہیں جہاں مسافر یک طرفہ یا واپسی کے ٹکٹ خرید سکیں گے۔ جلدی میں موجود افراد فوری بکنگ کر سکیں گے جبکہ دیگر مسافر نشستوں کے انتخاب اور اضافی سہولیات بھی حاصل کر سکیں گے۔

واضح سائن بورڈز کے ذریعے ٹیکسی اسٹینڈ، پارکنگ، واش رومز اور نماز کے کمروں کی سمت دکھائی گئی ہے۔ خصوصی افراد کے لیے الگ راستے اور آسان رسائی کا انتظام بھی رکھا گیا ہے تاکہ ہر مسافر باآسانی اسٹیشن استعمال کر سکے۔

پلیٹ فارم حصے میں فرش سے چھت تک شیشے کی بڑی کھڑکیاں نصب کی گئی ہیں جس سے قدرتی روشنی اندر آتی ہے۔ یہاں سے حجر پہاڑ اور سمندر کے خوبصورت مناظر واضح دکھائی دیتے ہیں۔ پلیٹ فارم پر ٹرین معلوماتی اسکرینز اور بڑی اینالاگ گھڑیاں بھی نصب کی گئی ہیں۔

تقریباً 51 ہزار 900 مربع میٹر رقبے پر قائم اس اسٹیشن کی تعمیر میں 20 ہزار 800 مکعب میٹر سے زائد کنکریٹ اور 2 ہزار 270 ٹن سے زیادہ اسٹیل استعمال کیا گیا۔ اتحاد ریل حکام کے مطابق اسٹیشن کی جگہ الحلال سٹی میں اسٹریٹجک بنیادوں پر منتخب کی گئی، جو فجیرہ انٹرنیشنل ایئرپورٹ سے صرف 12 منٹ کی مسافت پر واقع ہے۔

حکام کا کہنا ہے کہ اسٹیشن مکمل فعال ہونے کے بعد یہاں ریٹیل اسٹورز اور دیگر تفریحی سہولیات بھی شامل کی جائیں گی تاکہ یہ صرف ٹرانسپورٹ مرکز نہیں بلکہ خود ایک سیاحتی مقام بن جائے۔ ماہرین کے مطابق اتحاد ریل کا یہ منصوبہ فجیرہ کو ملک کے دیگر حصوں سے جدید اور تیز رفتار انداز میں جوڑنے میں اہم کردار ادا کرے گا۔