یو اے ای کے مختلف علاقوں میں موسلا دھار بارشیں، شام تک مزید بارش کا امکان

خلیج اردو
ابوظبی: متحدہ عرب امارات میں اتوار کے روز شدید گرمی سے پریشان شہریوں کو بارشوں نے خوشگوار حیرت میں مبتلا کر دیا، جب مختلف علاقوں میں موسلا دھار اور ہلکی بارش ہوئی۔ نیشنل سینٹر آف میٹرولوجی (این سی ایم) کے مطابق بارشوں کا سلسلہ شام ساڑھے سات بجے تک جاری رہنے کا امکان ہے۔

این سی ایم نے بتایا کہ العین کے علاقوں مزید، ملاقت، الہیّر، سا، ختم الشقلا، نحل، الفقع، سویحان، شوائب، مساكن اور ام غفہ میں بارش ریکارڈ کی گئی۔ شارجہ کے مدام، البحیص، الرویدہ، خضیرا اور رفادہ میں بھی شدید سے درمیانی بارشیں ہوئیں۔

اسٹورم سینٹر نے دبئی-العین روڈ اور العین کی ام غفہ روڈ پر شدید بارش کی ویڈیوز جاری کی ہیں، جن میں تیز ہواؤں کے جھکڑ کے ساتھ گردوغبار اور اڑتے ہوئے اشیاء دیکھے جا سکتے ہیں، جس سے سڑکوں پر حد نگاہ متاثر ہوئی۔

وادی الحلو میں بھی بارش ہوئی جس سے پہاڑوں کے درمیان واقع سبزہ زاروں کی خوبصورتی دوبالا ہو گئی۔

این سی ایم کے مطابق بارشیں دوپہر 1:30 بجے کے قریب شروع ہوئیں اور ان کے ساتھ مشرقی اور جنوبی علاقوں میں 45 کلومیٹر فی گھنٹہ کی رفتار سے چلنے والی تیز ہوائیں بھی تھیں۔ ان ہواؤں اور بادلوں کی آمد کنویکٹیو کلاؤڈز کے باعث ہوئی ہے۔

محکمۂ موسمیات نے بعض علاقوں میں نارنجی اور پیلے رنگ کے الرٹ جاری کرتے ہوئے شہریوں کو خبردار کیا ہے کہ بیرونی سرگرمیوں کے دوران محتاط رہیں اور موسمی حالات پر نظر رکھیں۔

ابوظبی پولیس نے بھی شہریوں سے اپیل کی ہے کہ بارش کے دوران ڈرائیونگ کرتے وقت احتیاط کریں اور سڑک کنارے نصب اسپیڈ بورڈز پر دی گئی متغیر حد رفتار کی پابندی کریں۔

رواں ماہ یہ پہلا موقع نہیں کہ یو اے ای میں بارش ہوئی ہو۔ 15 جولائی کو بھی مختلف علاقوں میں ہلکی بارش ہوئی تھی، جب کہ 16 جولائی کو شارجہ، راس الخیمہ اور عجمان میں ژالہ باری اور موسلا دھار بارش ریکارڈ کی گئی۔ دو روز قبل دبئی میں بھی پہلی بار ژالہ باری اور گرج چمک کے ساتھ بارش ہوئی تھی۔

آج صبح کے وقت ابوظبی کے کچھ علاقوں میں دھند کی وجہ سے سرخ اور پیلے رنگ کے الرٹ بھی جاری کیے گئے تھے۔

دوسری جانب محکمہ موسمیات نے بتایا ہے کہ ابوظبی کے غسیورہ اور مزیرع میں درجہ حرارت 49 ڈگری سینٹی گریڈ تک جا سکتا ہے، جبکہ دبئی میں 43 اور ابوظبی شہر میں 44 ڈگری سینٹی گریڈ تک جانے کی پیش گوئی کی گئی ہے۔