خلیج اردو
متحدہ عرب امارات میں بھارتی پاسپورٹ اور قونصلر خدمات کے نئے نظام کے آغاز کے دو ہفتے بعد بھی بعض درخواست گزاروں کو اپائنٹمنٹ کی کمی اور بیک لاگ کا سامنا ہے، تاہم بھارتی مشن نے یقین دہانی کرائی ہے کہ تمام بیک لاگ 15 اگست تک ختم کر دیا جائے گا۔
بھارتی کمیونٹی کے لیے 16 نئے انڈین قونصلر ایپلیکیشن سینٹرز (ICACs) متحدہ عرب امارات کی تمام سات ریاستوں میں فعال ہو چکے ہیں۔ یہ مراکز Alhind Tours & Travels کے زیر انتظام کام کر رہے ہیں تاکہ تقریباً 43 لاکھ بھارتی شہریوں کو تیز اور آسان خدمات فراہم کی جا سکیں۔
نئے مراکز میں ابوظبی میں 6، دبئی میں 2، شارجہ میں 2 جبکہ عجمان، فجیرہ، ام القوین، خورفکان، کلبا اور رأس الخیمہ میں ایک ایک مرکز قائم کیا گیا ہے۔ دبئی کے بر دبئی میں واقع UW Mall کا مرکز سب سے بڑا ہے، جہاں روزانہ 8 ہزار افراد کو خدمات فراہم کرنے کی گنجائش موجود ہے۔
حکام کے مطابق ہنگامی صورتحال میں بعض درخواست گزار بغیر پیشگی اپائنٹمنٹ کے بھی خدمات حاصل کر سکتے ہیں۔ ان میں فوری سفر کے ثبوت کے ساتھ تتکال (Tatkal) درخواستیں، نومولود بچوں کا پہلا پاسپورٹ، 60 سال یا اس سے زائد عمر کے بزرگ، اور پاسپورٹ گم ہونے کی صورت میں ایمرجنسی سرٹیفکیٹ کے درخواست گزار شامل ہیں۔ ایسے افراد کو ہنگامی صورتحال کا ثبوت، جیسے فوری فلائٹ ٹکٹ یا میڈیکل سرٹیفکیٹ، ساتھ لانا ہوگا۔
پاسپورٹ کی تجدید کے لیے درخواست گزار کو موجودہ یا میعاد ختم شدہ پاسپورٹ، یو اے ای رہائشی ویزے کی کاپی، اصل اور کاپی سمیت ایمریٹس آئی ڈی، اور مقررہ معیار کے مطابق دو حالیہ پاسپورٹ سائز تصاویر جمع کرانا ہوں گی۔
بھارتی حکومت کی جانب سے یکم جولائی 2026 سے فیس میں اضافہ کیا گیا ہے۔ 36 صفحات والے عام پاسپورٹ کی تجدید کی فیس 450 درہم جبکہ فوری تتکال سروس کی فیس 900 درہم مقرر کی گئی ہے۔ اس کے علاوہ 19 درہم کی سروس فیس بھی وصول کی جائے گی، جس میں پروسیسنگ، بائیومیٹرک اور کورئیر اخراجات شامل ہیں۔
قونصل خانے نے خبردار کیا ہے کہ اپائنٹمنٹ دلوانے یا درخواست جلد نمٹانے کے نام پر اضافی رقم وصول کرنے والے غیر قانونی ایجنٹوں سے محتاط رہیں۔
قونصل خانے کے مطابق نئی اپائنٹمنٹ سلاٹس روزانہ صبح 9 بجے اور رات 9 بجے جاری کی جاتی ہیں۔ جن درخواست گزاروں کو ابھی تک وقت نہیں ملا، انہیں انہی اوقات میں دوبارہ کوشش کرنے کا مشورہ دیا گیا ہے۔
حکام کے مطابق تتکال سروس کے تحت پاسپورٹ کی تجدید عموماً 3 ورکنگ ڈیز میں مکمل ہو جاتی ہے، جبکہ معمول کی درخواستوں پر کارروائی 7 سے 15 ورکنگ ڈیز تک لے سکتی ہے۔ بیک لاگ ختم ہونے کے بعد پروسیسنگ کا وقت مزید کم ہونے کی توقع ہے۔
