خلیج اردو
متحدہ عرب امارات کے شہر دبئی میں حکام نے شہریوں کو ہدایت دی ہے کہ وہ خریداری کے بعد اپنی رسید ضرور محفوظ رکھیں کیونکہ یہ خوراک کی قیمتوں میں غیر ضروری اضافے کے خلاف شکایت درج کروانے میں مددگار ثابت ہو سکتی ہے۔
دبئی محکمہ معیشت و سیاحت کے سیاحت سرگرمیوں کی نگرانی کے ڈائریکٹر احمد اہلی نے بتایا کہ دبئی کی خوراک کی فراہمی کا نظام مستحکم ہے اور مقامی و عالمی سپلائرز شہر کو مطلوبہ اشیاء مسلسل فراہم کر رہے ہیں۔
انہوں نے یہ بات معائنہ دورے کے دوران کہی جو الاویر پھل و سبزی منڈی اور قریبی یونین کوآپ ہائپرمارکیٹ میں کیا گیا۔
احمد اہلی کے مطابق اس ہفتے بعض علاقوں میں لوگوں کی جانب سے خوراک کی زیادہ خریداری دیکھنے میں آئی ہے، تاہم اشیائے خورونوش مناسب مقدار میں دستیاب ہیں۔ انہوں نے شہریوں کو ذمہ دارانہ خریداری کا مشورہ دیتے ہوئے کہا کہ ضرورت سے زیادہ خریداری کی صورت میں دکانوں کو مختصر وقت میں بار بار شیلف دوبارہ بھرنے میں مشکل پیش آتی ہے۔
انہوں نے کہا کہ خوراک کی قیمتوں کی نگرانی ہر ہفتے کی جاتی ہے اور بعد میں ہفتے میں دو مرتبہ اس کا جائزہ لیا جاتا ہے۔ قیمتوں میں تبدیلی کے امکانات کم ہیں، لیکن اگر کسی صارف کو لگے کہ قیمت غیر ضروری طور پر بڑھائی گئی ہے تو خریداری کی رسید اس شکایت کے لیے اہم ثبوت بن سکتی ہے۔
ان کے مطابق رسید دراصل صارف کے لیے ایک طرح کی ضمانت ہے کیونکہ اگر قیمت چند دن پہلے زیادہ تھی تو رسید اس کا ثبوت فراہم کرتی ہے اور حکام فوری کارروائی کر سکتے ہیں۔
ادھر عبداللہ بن طوق المری نے ایک پریس بریفنگ میں کہا کہ متحدہ عرب امارات کے پاس ضروری اشیاء کا ذخیرہ چار سے چھ ماہ تک کے لیے کافی ہے جبکہ درآمدی سامان کی آمد بھی معمول کے مطابق جاری ہے۔
حکام کے مطابق حکومت کی نئی قیمت پالیسی کے تحت نو بنیادی اشیائے خورونوش کی قیمتوں پر خاص نظر رکھی جا رہی ہے، جن میں کوکنگ آئل، انڈے، دودھ کی مصنوعات، چاول، چینی، مرغی، دالیں، روٹی اور گندم شامل ہیں۔ وزارت کی اجازت کے بغیر ان اشیاء کی قیمت بڑھانا ممکن نہیں۔
رمضان کے آغاز سے اب تک دبئی میں معائنہ مہم کے دوران صرف ایک دکان کو بلاجواز قیمت بڑھانے پر خلاف ورزی کا نوٹس جاری کیا گیا ہے۔
