خلیج اردو
متحدہ عرب امارات میں بھارتی پاسپورٹ، ویزا اور قونصلر خدمات کے لیے قائم کیے گئے الہند گلوبل سروسز کے نئے مراکز مکمل طور پر تیار ہونے کے باوجود تاحال عوام کے لیے نہیں کھولے جا سکے۔ کمپنی کو یکم جولائی سے خدمات سنبھالنی تھیں، تاہم عدالتی مقدمے کے باعث منتقلی کا عمل تاخیر کا شکار ہے۔
دبئی کے یو ڈبلیو مال میں قائم کمپنی کے سی پی وی (Consular, Passport and Visa) مرکز میں اس وقت سناٹا چھایا ہوا ہے۔ عملہ صرف ٹوکن سسٹم اور انتظار کے اوقات کی آزمائش کر رہا ہے، جبکہ انتظار گاہ اور درجنوں سروس کاؤنٹرز خالی پڑے ہیں۔
یہ مرکز تقریباً 12 ہزار مربع فٹ پر مشتمل ہے اور یہاں 45 سے زائد کاؤنٹرز قائم کیے گئے ہیں۔ منصوبہ تھا کہ یہاں پاسپورٹ، قونصلر اور دستاویزات کی تصدیق (اٹیسٹیشن) سمیت مختلف خدمات فراہم کی جائیں تاکہ درخواست گزاروں کا انتظار کم سے کم ہو۔
الہند گلوبل سروسز نے دبئی میں دبئی انویسٹمنٹ پارک (DIP) میں بھی ایک اور مرکز قائم کیا ہے، جبکہ دیگر مراکز ابوظہبی، العین، مصفح، مدینۃ زاید، الشارجہ، عجمان، فجیرہ، ام القوین، خورفکان، کلباء، رأس الخیمہ اور دیگر شہروں میں موجود ہیں۔ پہلی مرتبہ غیاثی میں بھی مرکز قائم کیا گیا ہے، جس سے الرویس اور الظفرہ ریجن میں رہنے والے بھارتی شہریوں کو سہولت ملے گی۔
عدالتی تنازع کیا ہے؟
الہند گلوبل سروسز کو نومبر 2025 میں ہونے والے مسابقتی ٹینڈر کے بعد یہ معاہدہ دیا گیا تھا۔ اس سے قبل بی ایل ایس 2011 سے متحدہ عرب امارات میں بھارتی پاسپورٹ، ویزا اور قونصلر خدمات انجام دے رہی تھی۔
تاہم ٹینڈر میں ناکام رہنے والی دو کمپنیوں نے دہلی ہائی کورٹ میں درخواست دائر کرتے ہوئے مؤقف اختیار کیا کہ انہیں تکنیکی جانچ کے مرحلے میں مناسب وجوہات کے بغیر نااہل قرار دیا گیا۔ اسی قانونی تنازع کے باعث نئے آپریٹر کو خدمات سنبھالنے میں تاخیر ہو رہی ہے، جبکہ عدالت کا فیصلہ جلد متوقع ہے۔
فی الحال خدمات کیسے حاصل کی جا سکتی ہیں؟
عدالتی فیصلے تک متحدہ عرب امارات میں بھارتی سفارتی مشنز نے قونصلر خدمات عارضی طور پر خود سنبھال لی ہیں۔
دبئی میں بھارتی قونصل خانہ اور ابوظہبی میں بھارتی سفارت خانہ نے واضح کیا ہے کہ اب تمام درخواست گزاروں کے لیے پیشگی آن لائن اپائنٹمنٹ لینا لازمی ہے۔ واک اِن سروس فی الحال دستیاب نہیں۔
گرمیوں کی تعطیلات کے باعث بھارتی سفارتی مشنز پر غیر معمولی رش دیکھنے میں آ رہا ہے اور روزانہ ایک ہزار سے زائد افراد پاسپورٹ اور دیگر قونصلر خدمات کے لیے رجوع کر رہے ہیں۔
