یو اے ای میں موسم گرما کے سفر کے کرایوں میں مزید اضافہ متوقع، آخری لمحات میں سستے ٹکٹ ختم ہونے کا خدشہ

خلیج اردو
یو اے ای میں گرمیوں کی چھٹیوں کے دوران سفر کرنے والے افراد کو ٹریول ایجنٹس نے خبردار کیا ہے کہ کم قیمت والے فلائٹ ٹکٹس جلد ختم ہو سکتے ہیں

ٹریول ماہرین کے مطابق جولائی اور اگست کے دوران سفری مانگ میں شدید اضافہ ہوگا جس کے باعث فضائی کرایے تیزی سے بڑھنے کا امکان ہے، اس لیے ٹکٹ جلد بک کرانا زیادہ فائدہ مند ہوگا۔

ماہرین کا کہنا ہے کہ جون کا مہینہ نسبتاً سستا ہے، تاہم جولائی اور اگست میں اسکولوں کی تعطیلات کے باعث فیملی ٹریول میں اضافہ ہوتا ہے جس سے قیمتیں بڑھ جاتی ہیں۔

ماہرین نے واضح کیا ہے کہ اس سال “آخری لمحے کی سستی ڈیلز” کی توقع نہیں کرنی چاہیے کیونکہ ایئرلائنز میں نشستوں کی دستیابی محدود ہوتی جا رہی ہے۔

ٹریول کمپنی کے ایک عہدیدار کے مطابق اگر مسافر دو سے چار ہفتے پہلے بکنگ کر لیں تو نمایاں بچت ممکن ہے، خاص طور پر دبئی سے یورپ اور جنوبی ایشیا کے روٹس پر۔

رپورٹ کے مطابق دبئی سے نئی دہلی، لندن، بنکاک اور نیویارک کے کرایوں میں واضح اضافہ دیکھا گیا ہے، جو بعض روٹس پر پچھلے سال کے مقابلے میں 20 سے 30 فیصد تک زیادہ ہے۔

ماہرین کا کہنا ہے کہ مشرقِ وسطیٰ، جنوبی ایشیا اور یورپ کے روٹس پر سب سے زیادہ طلب ہے کیونکہ زیادہ تر یو اے ای رہائشی اپنے آبائی ممالک کا سفر کر رہے ہیں۔

ایئرلائنز کو فیول لاگت میں اضافہ، محدود سیٹیں اور ہائی ڈیمانڈ جیسے مسائل کا بھی سامنا ہے جس سے کرایوں میں مزید اضافہ ہو سکتا ہے۔

ٹریول ایجنٹس نے مشورہ دیا ہے کہ مسافر تاخیر نہ کریں کیونکہ جتنی دیر ہوگی اتنے ہی کم آپشنز اور زیادہ قیمتیں سامنے آئیں گی۔