خلیج اردو
ممبئی کے علاقے کالینا میں واقع تاریخی ایئرلائن کالونی کے آخری رہائشیوں نے بھی اپنے گھروں کو الوداع کہہ دیا، جس کے ساتھ ہی ایک عہد اپنے اختتام کو پہنچ گیا۔
یہ کالونی 1960 اور 1970 کی دہائیوں میں ایئر انڈیا اور انڈین ایئرلائنز کے ہزاروں ملازمین کا مسکن تھی۔ 185 ایکڑ پر پھیلی اس رہائشی بستی میں ایک وقت میں سو سے زائد عمارتیں آباد تھیں۔
ایئر انڈیا کی نجکاری کے بعد ملازمین اور یونینز نے عدالتوں میں رہائش برقرار رکھنے کے لیے قانونی جنگ لڑی، تاہم سپریم کورٹ آف انڈیا نے مستقل قیام کی درخواست مسترد کر دی تھی۔ بعد ازاں رہائشیوں کو تعلیمی سال کے اختتام یعنی 31 مئی 2026 تک رہنے کی اجازت دی گئی۔
ایوی ایشن انڈسٹری ایمپلائز گلڈ کے مطابق اب باقی ماندہ خاندان بھی کالونی چھوڑ چکے ہیں اور یہ تاریخی بستی تقریباً مکمل طور پر خالی ہو گئی ہے۔
دوسری جانب بھارت میں سابق ایئر انڈیا جائیدادوں کی ازسرنو ترقی کا عمل بھی جاری ہے۔ ممبئی میں ایئر انڈیا کی معروف عمارت حکومت خرید رہی ہے جبکہ این بی سی سی لمیٹڈ دہلی کی سابق ایئر انڈیا کالونی کو جدید رہائشی منصوبے میں تبدیل کرنے کی تیاری کر رہی ہے۔
