عالمی غیر یقینی صورتحال کے باوجود یو اے ای سے پاکستان ترسیلاتِ زر مستحکم رہیں گی، پاکستانی وزیرِ مملکت

خلیج اردو
پاکستان کے وزیرِ مملکت برائے خزانہ و ریلوے اور وزیراعظم ڈلیوری یونٹ کے سربراہ بلال اظہر کیانی نے کہا ہے کہ عالمی جغرافیائی و سیاسی چیلنجز کے باوجود متحدہ عرب امارات سے پاکستان ترسیلاتِ زر نسبتاً مستحکم رہیں گی۔

ورلڈ گورنمنٹس سمٹ کے موقع پر خلیج ٹائمز سے گفتگو کرتے ہوئے بلال اظہر کیانی نے کہا کہ پاکستان میں میکرو اکنامک استحکام برقرار ہے اور اسی بنیاد پر معاشی ترقی کو آگے بڑھایا جائے گا۔ انہوں نے کہا کہ مستقبل میں بھی زرِ مبادلہ کی شرح نسبتاً مستحکم رہنے کی توقع ہے۔

انہوں نے یاد دلایا کہ 2023 میں پاکستان کو قرض نادہندگی کے خطرے کا سامنا تھا، تاہم آئی ایم ایف کے 3 ارب ڈالر کے اسٹینڈ بائی ارینجمنٹ کے بعد ملکی معیشت مستحکم ہوئی اور زرمبادلہ کے ذخائر میں بہتری آئی۔

بلال اظہر کیانی نے کہا کہ ماضی میں بھی ترسیلاتِ زر مستحکم رہی ہیں کیونکہ یہ زیادہ تر بیرونِ ملک مقیم پاکستانی اپنے والدین اور خاندان کی کفالت کے لیے بھجواتے ہیں۔

ادارہ برائے امیگریشن و اوورسیز ایمپلائمنٹ کے مطابق رواں مالی سال کے پہلے چھ ماہ میں پاکستان کو یو اے ای سے چار ارب ڈالر سے زائد ترسیلاتِ زر موصول ہوئیں۔

وزیرِ مملکت نے مزید کہا کہ گزشتہ چند برسوں میں زرِ مبادلہ کی شرح میں بھی مجموعی طور پر استحکام دیکھا گیا ہے، جو ترسیلاتِ زر کے تسلسل میں مددگار ثابت ہو رہا ہے۔