خلیج اردو
سام سنگ رواں سال گیلیکسی زیڈ فولڈ 8 کی کامیابی کے بعد 2027 میں ایک اور نئے طرز کا فولڈ ایبل فون متعارف کرانے کی تیاری کر رہی ہے۔
جنوبی کوریا کے معروف ٹیکنالوجی پلیٹ فارم ای ٹی نیوز کی رپورٹ کے مطابق سام سنگ ایک نئے وائیڈ فولڈ ماڈل پر کام کر رہی ہے، جس میں فون کو کھولنے کے بعد اس کی چوڑائی اس کی لمبائی سے زیادہ ہوگی۔
سام سنگ نے اگست 2026 کے آغاز میں گیلیکسی زیڈ فولڈ 8 لانچ کیا تھا، جس میں زیادہ چوڑی کور اسکرین فراہم کی گئی ہے تاکہ ویڈیوز دیکھنے، مطالعہ کرنے اور گیمنگ کے تجربے کو مزید بہتر بنایا جا سکے۔
201 گرام وزن کے ساتھ یہ سام سنگ کا اب تک کا سب سے ہلکا گیلیکسی زیڈ فولڈ فون ہے، جبکہ اس کے ڈسپلے کو پہلے سے زیادہ پائیدار بھی بنایا گیا ہے۔
رپورٹ کے مطابق سام سنگ 2027 میں دو نئی فولڈ ایبل ڈیوائسز متعارف کرا سکتی ہے، جن میں ایک ٹرائی فولڈ فون اور دوسرا وائیڈ فولڈ ماڈل شامل ہوگا۔
صنعتی ذرائع کا کہنا ہے کہ کمپنی نے ان دونوں ڈیوائسز کی تیاری کا عمل شروع کر دیا ہے اور سپلائرز کو بھی اس منصوبے سے آگاہ کر دیا گیا ہے۔
سام سنگ الیکٹرانکس کے موبائل ایکسپیرینس ڈویژن کے ڈیزائن ہیڈ ہبرٹ لی کے مطابق گیلیکسی زیڈ فولڈ 8 کو "ایموٹیو سلم” ڈیزائن کے تصور کے تحت تیار کیا گیا ہے، جس کا مقصد صرف فون کو پتلا بنانا نہیں بلکہ اسے زیادہ آرام دہ اور استعمال میں آسان بنانا بھی ہے۔
ہبرٹ لی کا کہنا ہے کہ گیلیکسی زیڈ فولڈ 8 کے ڈیزائن کے لیے پاسپورٹ سے بھی متاثر ہو کر کام کیا گیا، کیونکہ پاسپورٹ کو آسانی سے ہاتھ میں پکڑا اور ساتھ رکھا جا سکتا ہے۔
تاہم، گیلیکسی زیڈ فولڈ 9 کے حوالے سے سام سنگ کی جانب سے ابھی تک کوئی باضابطہ اعلان نہیں کیا گیا، لیکن ٹیکنالوجی کے شوقین افراد 2027 میں نئی فولڈ ایبل ڈیوائسز کے منتظر ہیں۔
